। आजदेखि भुटानको थिम्पुमा सुरु हुने एएफसी यू-२० महिला एसियन कप छनोटमा नेपालले घरेलु टोली भुटानसँग खेल्दैछ ।
समूह ए मा रहेको नेपाल र भुटानबीचको खेल थिम्पुस्थित चाङलिमियाङ स्टेडियममा साँझ पौने ६ बजे सुरु हुनेछ । नेपाल र भुटान दुवै सुखद सुरुवात गर्ने लक्ष्यमा छ ।
केही दिनअघि बंगलादेशको ढाकामा भएको साफ यू२० च्याम्पियनसिपमा नेपालले भुटानलाई दुई खेलमा सहजै हराएको नेपालको मनोबल उच्च हुनेछ । भुटानलाई भने घरेलु मैदान र दर्शकको साथ हुनेछ ।
मुख्य प्रशिक्षक याम प्रसाद गुरुङले साफ यू२० र एएफसी यू-२० एसियन कप छनोट फरक किसिमको प्रतियोगिता भएको बताए । साथै उनले घरेलु टोली भुटानलाई कमजोर टिमको रुपमा समेत नलिने बताए ।
साफ यू२० महिला च्याम्पियनसिपमा नेपालले भुटानलाई दुवै खेलमा सहजै पराजित गरेको थियो । ‘साफ र एएफसी छनोट खेल्नु फरक छ । यसमा भुटान घरेलु मैदानमा खेल्दैछ । हामी भुटानलाई सम्मान गर्छौं । उनीहरु डे बाई डे राम्रो खेल्दैछ,’ गुरुङले भने ‘भुटानलाई दर्शकको साथ छ र घरेलु मैदानको साथ हुन्छ । साफको नतिजाले भुटानलाई कमजोर सोच्दिन ।’
साफ यू२० महिला च्याम्पियनसिपमा नेपालले भुटानलाई ६-१ र ८-० ले पराजित गरेको थियो । यसैगरी गुरुङले समूहको तीनवटै टिमलाई सम्मान गरेर खेल्ने बताएका थिए ।
यस्तै भुटानकी प्रशिक्षक टंक माया घलेले पनि छनोट प्रतियोगिताका लागि तयार रहेको बताइन् । ‘हामी छनोट प्रतियोगिताको लागि तयार छौँ र खेलाडीहरु सबै सकरात्मक छन् ।
भोलीको खेलका लागि तयार छौँ’ उनले भनिन्, ‘भर्खरै हामीले साफ यू२० खेलेका थियौँ र धेरै अनुभव हासिल गर्यौँ । हामी गल्तीहरुलाई सच्याउँदै यस पटक राम्रो नतिजा ल्याउने आशा छ ।’
