: रुसबाट तेल आयात गर्ने सम्बन्धमा अमेरिका र युरोपेली संघले उठाएका प्रश्नको भारतले जवाफ दिएको छ। भारतीय विदेश मन्त्रालयका प्रवक्ता रणधीर जयसवालले सामाजिक सञ्जाल एक्समा पोस्ट गदै अमेरिका र युरोपेली संघलाई जवाफ दिएका हुन्।
उनले भने, ‘युक्रेन द्वन्द्व सुरु भएदेखि नै रुसबाट तेल आयात गर्ने मुद्दामा भारत अमेरिका र युरोपेली संघको निशानामा परेको छ। वास्तवमा द्वन्द्व पछि परम्परागत आपूर्ति युरोपतिर मोडिएको कारण भारतले रुसबाट तेल आयात गर्न थाल्यो।’
रणधीर जयस्वालले त्यतिबेला अमेरिकाले नै विश्व तेल बजारको स्थिरता कायम राख्न भारतलाई रुसबाट आयात गर्न प्रोत्साहित गरेको उल्लेख गरेका छन्।
उनले लेखेका छन्,‘भारतले आफ्ना उपभोक्तालाई सस्तो र स्थिर ऊर्जा प्रदान गर्न आयात गर्छ। यो विश्वव्यापी बजारको अवस्थाको बाध्यता हो। तर भारतको आलोचना गर्ने देशहरू आफैं रूससँग व्यापार गरिरहेका छन्। भारत जस्तै यो व्यापार उनीहरूको देशका लागि आवश्यक बाध्यता होइन।’
रणधीर जयसवालले युरोप–रूस व्यापारमा ऊर्जा मात्र नभई मल, खनिज उत्पादन, रसायन, फलाम र स्टीलका साथै मेसिनरी र यातायातका सामान पनि रहेको बताए।
उनले भने,‘जहाँसम्म अमेरिकाको कुरा छ, उसले अझै पनि आफ्नो आणविक उद्योगका लागि युरेनियम हेक्साफ्लोराइड, विद्युतीय सवारी साधन उद्योगका लागि प्यालेडियम, मल र रसायन रूसबाट आयात गर्दछ।’
रणधीर जयसवालले त्यसैले भारतलाई लक्षित गर्नु अनुचित र तर्कहीन रहेको बताए। भारतले आफ्नो राष्ट्रिय हित र आर्थिक सुरक्षाको रक्षा गर्न सबै आवश्यक कदम चाल्ने उनले बताए।
