— मापदण्डविपरीत सञ्चालनमा रहेको एक मेडिकलमा जिल्ला प्रशासन कार्यालय उदयपुरले ताला लगाएको छ । अनुगमनका क्रममा मापदण्डविपरीत सञ्चालन गरेको पाइएपछि चौदण्डीगढी नगरपालिका–४ बसाहामा सञ्चालित बीज मेडिकल हलमा प्रशासनले ताला लगाएको हो ।
सोमबार सहायक प्रमुख जिल्ला अधिकारी विक्रमप्रसाद पाण्डेयको नेतृत्वमा रहेको अनुगमन टोलीले चौदण्डीगढी नगरपालिकाभित्रका औषधि पसल तथा मेडिकलमा अनुगमन गरेको छ । अनुगमन टोलीले स्थानीय पाथिभरा डेन्टल क्लिनिक, शुभम डेन्टल प्रालि, दिव्यान्स फार्मेसीलाई समेत जरिवाना गरेको छ । दर्ता प्रमाणपत्र नभएकाले उनीहरूलाई जरिवाना गरिएको सहायक प्रजिअ पाण्डेयले बताए । अवैधानिक रूपमा मापदण्ड विपरीत सञ्चालनमा रहेकाले बीज मेडिकल हलमा भने ताला लगाइएको उनले बताए ।
सहायक प्रजिअसहित स्वास्थ्य कार्यालय, खाद्य प्रविधि तथा गुण नियन्त्रण कार्यालय, घरेलु तथा साना उद्योग कार्यालय, करदाता सेवा कार्यालय गाईघाट र चौदण्डीगढी नगरपालिकाको टोलीले संयुक्त रूपमा अनुगमन गरेको हो ।
अनुगमनका क्रममा पाइएका म्याद समाप्त भएका औषधि टोलीले जफत गरेको छ । उदयपुरमा सञ्चालित धेरै मेडिकल मापदण्डविपरीत सञ्चालन रहेको गुनासो आउन थालेपछि जिल्ला प्रशासनको नेतृत्वमा अनुगमन गरिएको पाण्डेयले बताए ।
