— म्यान्माको सेनाप्रति बफादार (जुन्टा) सरकारले विद्रोहीको कब्जामा रहेको रुबी खानी क्षेत्रमा शनिबार गरेको हवाई हमलामा परी कम्तीमा १३ जनाको मृत्यु भएको सशस्त्र विपक्षी समूहका प्रवक्ताले बताएका छन् ।
२०२१ मा सेनाले सत्ता कब्जा गरेयता म्यान्मामा गृहयुद्ध चर्किएको छ । म्यान्माका प्रजातन्त्र समर्थक समूहहरूले लामो समयदेखि सक्रिय जातीय सशस्त्र समूहहरूसँग नागरिकका सार्वजनिक सरोकारका विषयमा ठाउँ–ठाउँमा सहकार्य गरिरहेका छन् । रुबी व्यापारको केन्द्रसहित मोगोक सहरमा सेनाले गरेको कारबाहीमा खासै प्रभाव नपारे पनि २०२३ को अन्त्यमा सुरु भएको संयुक्त आक्रमणले भने मोगोकसहित धेरै क्षेत्रहरू कब्जा गर्न सफल भएको छ ।
म्यान्माका बहुमूल्य पत्थर र दुर्लभ खनिज तत्त्वहरूका लागि धनी मानिन्छ । सेनाले उक्त क्षेत्रमा आफ्नो उपस्थिति देखाउन चिनियाँ हतियारको सहयोग लिएको छ । सुरक्षाको कारण देखाउँदै नाम नबताउने सर्तमा एक स्थानीयले स्थानीय समयअनुसार बिहान सवा ८ बजे भएको हमलामा परी सात जनाको घटनास्थलमा नै मृत्यु भएको र ६ जना घाइतेको उपचारका क्रममा मृत्यु भएको बताए । उनका अनुसार मृत्यु हुनेमा एक बौद्ध भिक्षु र मोटरसाइकलमा सवार बाबुछोरा पनि परेका थिए । ती प्रत्यक्षदर्शीले भने, ‘सो क्षेत्रबाट अघि बढिरहेको एउटा कार पनि हमलामा पर्दा चालकसहित सात जना घाइते भएका थिए ।’
चार वर्षअघि आङ सान सुकीको सरकार अपदस्थपछि घोषणा गरिएको आपत्कालीन अवस्थालाई जुन्टाले बिहीबार अन्त्य गरेको छ भने डिसेम्बरमा हुने निर्वाचनलाई द्वन्द्वका लागि तयारीको रणनीतिको संज्ञा दिएको छ ।
