— उमेर ४ देखि १४ वर्षका विद्यार्थीलक्षित ग्रासरुट फुटबल कार्यक्रम ‘फिफा फुटबल फर स्कुल्स’ नेपालमा पनि बिहीबार सुरु भएको छ । दशरथ रंगशालामा प्रधानमन्त्री केपी शर्मा ओलीले उक्त अभियानको शुभारम्भ गरेका थिए । प्रधानमन्त्रीले राजधानीमा आयोजित कार्यक्रममा सहभागी विद्यालयमध्ये कौस्तुभ एकेडेमीका शिक्षक र विद्यार्थीलाई बल हस्तान्तरण गर्दै अभियान सुरु गरे ।
अखिल नेपाल फुटबल संघ (एन्फा) ले यो कार्यक्रमलाई ७७ वटै जिल्लाका १ हजार ७२ विद्यालयमा सञ्चालन गर्ने लक्ष्य लिएको राखेको छ । त्यसक्रममा ३२ हजार ६ सय ४० वटा बल वितरण गरिने एन्फाले जनाएको छ ।
फिफा अध्यक्ष जियानी इन्फान्टिनोको पहलमा ‘फुटबल फर स्कुल्स’ कार्यक्रम ६ वर्षयता युनेस्कोसँगको सहकार्यमा हुँदै आएको छ । सन् २०१९ मा लेबननबाट सुरु भएको कार्यक्रमले विश्वभर करिब ७० करोड बालबालिकाको शिक्षा, विकास र सशक्तीकरणमा योगदान दिने उद्देश्य छ । हालसम्म १ सय ३९ राष्ट्रमा यो कार्यक्रम भइरहेको छ । एन्फाले शिक्षा, विज्ञान तथा प्रविधि र युवा तथा खेलकुद मन्त्रालयसँगको सहकार्यमा कार्यक्रम अगाडि बढाएको हो ।
प्रधानमन्त्री ओलीले कार्यक्रममा सहभागी युवा खेलाडीलाई प्रोत्साहित गर्दै ५० हजार दर्शक क्षमताको रंगशालामा खेल्न पाउने उद्घोष गरेका थिए । उनले भने, ‘सरकारले खेलकुद विकासमा प्राथमिकता दिएको छ । अब भक्तपुरको सूर्यविनायकमा ५० हजार दर्शक क्षमताको फुटबलको नयाँ रंगशाला निर्माण हुनेछ । यहाँ उपस्थित कलिला नानीबावुले आउने दिनमा त्यो रंगशालामा खेल्न पाउने छौं ।’ ‘फिफा फुटबल फर स्कुल्स’ कार्यक्रम म्यानेजर एन्टोनियो ब्युनानो सान्चेज र प्राविधिक सल्लाहकार अल्बर्टो जियाकोमिनीको प्रत्यक्ष निगरानीमा शुभारम्भ भएको हो ।
