: झापा महिला गोल्डकप अन्तर्राष्ट्रिय आमन्त्रण नकआउट फुटबल प्रतियोगिता हुने भएको छ। शिवसताक्षी नगरपालिका–११ स्थित नवनिर्मित दूधे रंगशालामा आगामी कात्तिक १५ देखि २२ गतेसम्म सञ्चालन हुने प्रतियोगितामा मोफसलमै सर्वाधिक पुरस्कार राशि राखिने आयोजक समितिले जनाएको छ।
गोल्डकप आयोजक समितिले बिहीबार दुधे रंगशालामा आयोजना गरेको पत्रकार सम्मेलनमा सो प्रतियोगिताको बारेमा जानकारी गराउँदै समितिका अध्यक्ष सन्तोष थोप्राले महिला फुटबलको विकास, प्रवर्द्धन र ग्रामीण क्षेत्रका महिला खेलाडी उत्पादनमा टेवा पुर्याउने उद्देश्यले जिल्लामै पहिलो पटक महिला गोल्डकप गर्न लागिएको बताए।
काठमाडौंबाहिर सबैभन्दा बढी फुटबलको गतिविधि हुने जिल्लाको रुपमा परिचित झापा जिल्लालाई महिला फुटबलको हबको रुपमा पनि विकसित गराउन लक्ष्य रहेको अध्यक्ष थोप्राले बताए। शिवसताक्षी नगरपालिकाको संरक्षण हुन लागेको प्रतियोगितामा विजेता र उपविजेताले सर्वाधिक राशिको पुरस्कार पाउने छन्।
त्यस्तै, मस्ट भ्यालुएवल प्लेयर, उत्कृष्ट गोलकिपर, उत्कृष्ट डिफेन्डर, उत्कृष्ट मिडफिल्डर, उत्कृष्ट प्रशिक्षक र उच्च गोलकर्ताले पुरस्कार पाउने छन्। प्रत्येक खेलको प्लेयर अफ द म्याचलाई नगद र ट्रफी प्रदान गरिनेछ। प्रतियोगितामा आयोजकको तर्फबाट एक टिम रहनेछ। त्यस्तै, नेपालका तीन विभागीय टोली त्रिभुवन आर्मी, नेपाल एपिएफ र नेपाल पुलिस क्लबका महिला टिमको सहभागिता हुने टुङ्गो लागिसकेको छ। एक टिम भारत, एक टिम भुटान तथा बाँकी दुई टिम नेपालका ए डिभिजन क्लबका हुने छन्। प्रतियोगिता सञ्चालन गर्न करिब एक करोड रुपैयाँ खर्च हुने जनाइएको छ।
तीन महिना बाँकी रहेकोले अहिले नै पुरस्कार राशि नतोकिएको र पुरस्कार राशि चाहिँ मोफसलकै सर्वाधिक हुने अध्यक्ष थोप्राले बताए। अहिले धमाधम रंगशालाको निर्माण तथा स्तरोन्नति धमाधम भइरहेको छ। पक्की प्यारापिट निर्माण, अस्थायी प्यारापिट निर्माण, खेलमैदानको स्तरोन्नति असोजसम्म सक्ने गरी तीव्र स्तरमा काम भइरहेको उनको भनाई छ।
गोल्डकपकै दिन रंगशालाको उद्घाटन
करिब साढे चार बिगाहा क्षेत्रमा फैलिएको निर्माणाधीन दुधे रंगाशालाको गोल्डकपको शुभारम्भकै दिन उद्घाटन गरिने शिवसताक्षी नगरपालिका प्रमुख मेगाहाङ्ग थोप्राले बताए। वन क्षेत्रको खाली सरकारी जमिनलाई फुटबल प्रेमीहरूले संरक्षण गर्दै खेल मैदानमा परिणत गरेको इतिहास छ। सोही जमिनलाई २०७४ सालमा शिलान्यास गरी दुधे रंगशाला नामकरण गरी पहिलो चरणमा घेराबाराको काम गरिएको थियो।
हाल पक्की प्यारापिट निर्माणको काम अन्तिम चरणमा पुगेको छ। संघीय, प्रदेश र स्थानीय सरकारको लगानीमा अहिलेसम्म २ करोड १८ लाख रुपैयाँ खर्च भइसकेको छ। जसबाट घेराबारा, खेल मैदान, नाला र प्यारापिट निर्माण गरिएको नगर प्रमुख थोप्राले बताए। त्यस्तै चालु आर्थिक वर्षका लागि संघीय सरकारबाट ३ करोड र नगरपालिकाको तर्फबाट ५० लाख गरी साढे तीन करोडमा अन्य संरचना निर्माण गर्ने तयारी भइरहेको उनको भनाइ छ।
