: अमेरिकी राष्ट्रपति डोनाल्ड ट्रम्पले दक्षिण कोरियाबाट निर्यात हुने सामानमा १५ प्रतिशत कर लगाउने बताएका छन्। उनको यो घोषणा दक्षिण कोरियासँगको व्यापार सम्झौता पछि आएको हो।
‘मलाई यो घोषणा गर्न पाउँदा खुसी लागेको छ। संयुक्त राज्य अमेरिका दक्षिण कोरियासँग व्यापार सम्झौतामा पूर्ण रूपमा सहमत भएको छ,’ राष्ट्रपति ट्रम्पले सामाजिक सञ्जालमा लेखे।
दक्षिण कोरियाली राष्ट्रपति ली जे–म्युङले यो सम्झौताले आफ्नो देशलाई अन्य देशभन्दा समान वा राम्रो स्थितिमा पुर्याउने बताएका छन्।
राष्ट्रपति ट्रम्पको यो घोषणा व्यापार सम्झौताका लागि तोकेको अगस्ट १ को समयसीमा समाप्त हुनुभन्दा एक दिन अघि आएको हो।
देशहरूले यो समयसीमा भित्र अमेरिकासँग सम्झौता गर्नुपर्नेछ। अन्यथा उनीहरूले उच्च शुल्कको सामना गर्नुपर्नेछ।
दक्षिण कोरियाले पनि अमेरिकासँग यो सम्झौतामा हस्ताक्षर नगरेको भए २५ प्रतिशत कर लगाइने थियो।
