— जनता समाजवादी पार्टी (जसपा) नेपालका अध्यक्ष उपेन्द्र यादवले अहिलेसम्मकै सरकारको गलत नीति र योजनाले चूरे विनाश हुँदा मधेश मरुभूमितिर गइरहेको बताएका छन् ।
बुधबार सप्तरीको राजविराज नगरपालिका–२ मा आयोजना गरिएको जसपा, नेपाल एकताको प्रथम जिल्ला अधिवेशन उद्घाटन गर्दै उनले यस्तो आरोप लगाएका हुन् । ‘अहिले पुरै मधेश सुक्खा र संकटग्रस्त बनिसकेको छ, अन्नदाता किसान त्राहिमाम–त्राहिमाम गरिरहेका छन्, खेतमा धुलो उडिरहेको छ,’ अध्यक्ष यादवले भने, ‘विगतमा यस्तो समस्या नआएको होइन तर १०/१५ फिटमा पाइने पानी यसपालिदेखि तीन सय फिटमा पनि पाउनै छाड्यो ।’
सरकारले चूरै हुँदै राजमार्ग बनाएर बसोबासको नाममा चूरे क्षेत्र अतिक्रमण गरेर वन जंगल विनाश गर्दा यो समस्या बढ्दो रहेको उनले बताए । ‘यो सुरुआत मात्रै हो, आगामी दिनमा अझ विकराल रुप लिनसक्छ,’ उनले भने, ‘चूरे संरक्षण गर्न अहिलेसम्मकै सरकारको गलत नीति, योजना रहँदा पानीको सतह तल गएर मधेश मरुभूमितिर गइरहेको छ ।’
देश र मधेशलाई बचाउनका लागि चूरेको संरक्षण गर्न आवश्यक रहेको अध्यक्ष यादवको भनाइ छ । ‘चूरेको संरक्षण गर्न बर्सेनि अर्बौं रुपैयाँको वैदेशिक सहायता पनि आउँछ तर सरकार अझ चूरेमा सडक बनाउनेदेखि होटल खोल्न अनुमति दिने जस्ता कार्य गर्दै आएको छ,’ उनले थपे, ‘पर्यावरण संरक्षणको विषय पनि छलफलमै सीमित राख्दा यो समस्या बढिरहेको छ तर अब यसमा चुक गर्ने समय रहेन ।’
अन्नदाता किसानका लागि सहुलियत ऋण, सिंचाइ र मलखाद लगायतका सहुलियत प्याकेजसमेत ल्याउन अध्यक्ष यादवले सरकारसँग आग्रह गरे ।
