: अमेरिका पूर्वराष्ट्रपति बाराक ओबामाले गाजामा सहायता पुग्न दिनुपर्ने बताएका छन्। ओबामाले सामाजिक सञ्जाल एक्समा लेख्दै गाजाका मानिसबाट खाना र पानीलाई टाढा राख्नुको कुनै तर्क नरहेको बताएका हुन्।
गाजामा भोकमरी, कुपोषण र अनिकाल रहेको भन्दै ओबामाले यो अवस्था देखेर विश्व चुप लागेर बस्न नसक्ने बताए। उनले भने,‘गाजा संकटको स्थायी समाधानका लागि इजरायली बन्धकको रिहाइ र इजरायली सैन्य कारबाहीको अन्त्य आवश्यक छ। यस्ता लेखले निर्दोष मानिसको भोकमरीबाट हुने मृत्युको त्रासदी रोक्न तत्काल कारबाहीको आवश्यकतालाई जोड दिन्छन्।’
गाजामा खाद्यान्न अभावले अनिकाल जस्तो अवस्था निम्त्याएको छ। विश्व स्वास्थ्य संगठनले गाजामा कुपोषण खतरनाक स्तरमा पुगेको र तीव्र गतिमा बढिरहेको चेतावनी दिएको छ।
आइतबार, जोर्डन र युएईले हवाई मार्गबाट राहत सामग्री खसालेका थिए।
यसैबीच इजरायलले गाजाका केही भागमा दैनिक १० घण्टा सैन्य कारबाही बन्द गर्ने र संयुक्त राष्ट्र संघलाई राहत सामग्री पठाउनका लागि एउटा कोरिडोर खोल्ने बताएको छ।
