— साउन लागिसक्दा पनि मधेशमा खडेरी छ । खेतमा धाँजा फाटेका छन् । पानीको हाहाकार भइरहेका बेला वीरगन्ज महानगरपालिका–१७ अलौस्थित इदगाहमा शनिबार स्थानीय मुस्लिम समुदायले पानीको माग गर्दै ‘इस्तिस्का’ नमाज प्रार्थना गरेका छन् ।
शनिबार बिहान पानीका लागि विशेष धार्मिक प्रार्थना गरिएको नमाजमा सहभागी स्थानीय आशिक अन्सारीले बताए । साउन लागिसक्दा पनि मनसुनी वर्षा नभएर जनजीवन कष्टकर तथा खेतीपाती समेत प्रभावित भएपछि मुस्लिम समुदायले अल्लाहसँग पानीका लागि विशेष नमाज अदा गर्दै प्रार्थना गरेको उनले बताए ।
सामूहिक प्रार्थनामा स्थानीय करिब चार सयको संख्यामा मुस्लिम पुरुष सहभागी थिए । यस्तै प्रार्थना शनिबार पर्साको पोखरिया नगरपालिकामा पनि आयोजना गरिएको उनले बताए ।
यो विशेष प्रार्थना आकासे पानीका लागि नै गर्ने गरिएको छ । लामो समयको अन्तरालपछि यसरी मुस्लिम समुदायले जिल्लामा विशेष खालको सामूहिक प्रार्थनाको आयोजना गरेका हुन् ।
