— रुपन्देहीमा दुई बालकको डुबेर मृत्यु भएको छ । शनिबार दिउँसो ३ बजेतिर जिल्लाको सिद्धार्थनगर–१ स्थित डण्डा खोलामा पौडी खेल्ने क्रममा उनीहरुको डुबेर मृत्यु भएको जिल्ला प्रहरी कार्यालय रुपन्देहीले जनाएको छ ।
मृत्यु हुनेमा सिद्धार्थनगर–९, भट्टटोल बस्ने चण्डिप्रसाद अर्यालका छोरा १४ वर्षीय प्रज्वल र सिद्धार्थनगर–७ बस्ने लीलाधर न्यौपानेका छोरा १५ वर्षीया दिनेश रहेको डीएसपी गणेश सापकोटाले जानकारी दिए ।
उनका अनुसार बालकहरु पौडी खेल्ने क्रममा हराएको भन्ने सूचनापछि नेपाल प्रहरी र सशस्त्र प्रहरीको संयुक्त टोलीले खोजी गर्दै जाँदा साढे चार बजे डण्डा खोलाको पानीमा डुबेर मृत अवस्थामा उनीहरु फेला परेका थिए ।
पक्लिहवा कृषि क्याम्पस पछाडि रहेको डण्डाखोलामा ५ जना बालकहरु पौडी खेल्न गएका थिए । पाँचजनामध्ये ३ जनालाई सकुशल उद्धार गरिएको थियो भने अर्याल र न्यौपाने डुबेर मृत अवस्थामा फेला परेका थिए ।
डीएसपी सापकोटाका अनुसार शव पोस्टमार्टमका लागि भैरहवास्थित भीम अस्पताल पठाइएको हो ।
