: अमेरिकी राष्ट्रपति डोनाल्ड ट्रम्पले अमेरिका र जापानबिच एक प्रमुख व्यापार सम्झौतामा सहमत भएको घोषणा गरेका छन्। ट्रम्पले सम्झौताअन्तर्गत जापानले अमेरिकामा ५५० अर्ब डलर लगानी गर्नेछ र १५ प्रतिशत पारस्परिक भन्सार शुल्क तिर्ने जानकारी गराएका छन्।
ट्रम्पले आफ्नै सामाजिक सञ्जाल ट्रुथ सोसलमा भनेका छन्,'हामीले जापानसँग एक विशाल सम्झौता सम्पन्न गरेका छौं। सम्भवत: अहिलेसम्मकै सबैभन्दा ठूलो सम्झौता हो।'
उनले जापानले आफ्नो अर्थतन्त्रलाई अमेरिकी सामानका लागि खुला गर्ने बताएका छन्। यसमा कार, ट्रक, चामल र केही कृषि उत्पादनहरू समावेश छन्।
यसको पुष्टि गर्दै जापानी प्रधानमन्त्री शिगेरु इशिबाले अब जापानी कार कम्पनीहरूले अमेरिकामा निर्यातमा १५ प्रतिशत भन्सार तिर्नुपर्ने बताएका छन्। जुन पहिले २५ प्रतिशत थियो।
ट्रम्पले अमेरिका-जापान व्यापार सम्झौताको घोषणा गरेपछि जापानको निक्केई २२५ सूचकांक प्रारम्भिक व्यापारमा २.५ प्रतिशतभन्दा बढीले बढेको छ। टोयोटा, निसान र होन्डा जस्ता प्रमुख कार कम्पनीहरूको शेयरमा पनि वृद्धि देखिएको छ।
हालै ट्रम्पले अगस्ट १ अघि जापानसँग सम्झौता नभएमा २५ प्रतिशत भन्सार कर लगाउने चेतावनी दिएका थिए। जापान अमेरिकाको सबैभन्दा ठूलो व्यापारिक साझेदार मध्ये एक हो।
