। मुलुककै अग्रणी मध्येको औद्योगिक घराना पञ्चकन्या ग्रुपले रुपन्देहीको सियारीमा नेपालकै ठूलो यूपीभीसी उद्योग ‘पञ्चकन्या डिमेक्स’स्थापना गरेको छ ।

उद्योगबाट उत्पादित यूपीभीसीका झ्याल–ढोका एक वर्षदेखि बिक्रीवितरण गर्दै आएको कम्पनीले सोमबार औपचारिक रुपमा आफ्ना चार ब्राण्डका उत्पादन सार्वजनिक गरेको छ ।




उद्योगले सोमबार अनलाइनखबर डटकम मार्फत पञ्चकन्या डिमेक्स, निओ प्लास्ट, टोनिस र साल गरी चार थरिका यूपीभीसी प्रोफाइलको अफिसियल लञ्च गरेको हो । उद्योगले आफ्नो उत्पादनमा २० वर्ष वारेन्टी दिएको छ ।

मुलुककै अग्रणी मध्येको औद्योगिक घराना पञ्चकन्या ग्रुपले नेपालमै पहिलोपटक अन्तर्राष्ट्रिय गुणस्तर र डिजाइनका उडन, ग्रे, वालनट र ब्ल्याक कलरका प्रोफाइल उत्पादन गरेको जनाएको छ । अन्य उद्योगले हालसम्म सेतो रंगका प्रोफाइल मात्रै उत्पादन गरिरहेका छन् ।


आफ्नै स्वामित्वको २ बिघा जग्गामा ८० करोड लगानी गरी सञ्चालन भएको यो उद्योग नेपालकै ठूलो यूपीभीसी उद्योग हो । उद्योगले हाल ६५ जना बढीलाई प्रत्यक्ष रोजगारी दिएको छ ।

फलामे छड, खानेपानीका पाइप, पीभीसी पाइप, रेडिमेड कंक्रिट सहितका उत्पादनमा संलग्न पञ्चकन्या ग्रुपले निर्माण उद्योगको ‘वान विन्डो सोलुसन’ बन्न यूपीभीसी प्रोफाइल उद्योग पनि सञ्चालनमा ल्याएको उद्योगका अध्यक्ष उज्ज्वलकुमार श्रेष्ठले बताए ।



उद्योगबाट उत्पादित यूपीभीसी प्रोफाइलबाट बनेका झ्याल र ढोका निजी प्रयोजनका घरदेखि नेपालकै ठूलो हाउजिङ कम्पनी होराइजन अपार्टमेन्ट, तारे होटेल, अफिसहरुमा माग भइरहेको श्रेष्ठले बताए ।

युरोपियन प्रविधिको प्लान्ट जडित उद्योगले अन्तर्राष्ट्रिय गुणस्तरका यूपीभीसी उत्पादन गरेकाले जर्मनको प्रख्यात एसकेजेड संस्थाले गुणस्तर प्रमाण चिह्न प्रदान गरिसकेको श्रेष्ठले बताए ।

पञ्चकन्या डिमेक्स प्रोफाइलको अर्को महत्वपूर्ण विशेषता यसमा प्रयोग हुने टीपीई ग्यासकेट (रबर) हो । जुन अन्तर्राष्ट्रिय गुणस्तरको भएकाले अरु जस्तो छिटै टुटफुट नहुने, नबिग्रिने र लामो समयसम्म टिकाउ हुने दाबी गरिएको छ ।

दुई वर्षको अध्ययनले नेपालमा वार्षिक १० हजार मेट्रिक टनसम्म अर्थात नेपालमा खपत हुने कूल यूपीभीसी बजारको ९० प्रतिशत हिस्सा चीन र भारतबाट आयात भएको देखेपछि यसमा राम्रो सम्भावना देखेर आयात प्रतिस्थापन र भविष्यमा निर्यात पनि गर्ने लक्ष्य सहित नयाँ उद्योगमा लगानी गरेको अध्यक्ष श्रेष्ठले बताए ।



श्रेष्ठका अनुसार हाल आयात हुने यूपीभीसी परिमाणमध्ये ९० प्रतिशत चीन र १० प्रतिशत भारतबाट हुने गर्छ । ‘पाँच दशकदेखि उद्योग र उत्पादनको अनुभव बटुल्दै अघि बढ्ने क्रममा नेपालमा चीन र भारतबाट यूपीभीसी आयातको दर तीब्र गतिमा बढेको देखेपछि दुई वर्ष अध्ययन गर्दा राम्रो सम्भावना देखेर स्वदेशमै उत्पादन गरी आत्मनिर्भर बन्ने र आयात प्रतिस्थापन गर्ने उद्देश्यले लगानी गरेका हौं’ श्रेष्ठले भने, ‘अन्य उत्पादनमा पञ्चकन्या ब्राण्डको जुन जनविश्वास छ, त्यसलाई यूपीभीसी प्रोफाइलबाट थप उचाइमा पुर्‍याउने संकल्प सहित गुणस्तर र डिजाइनमा ध्यान दिएका छौं ।’

वार्षिक उत्पादन क्षमता ६ हजार मेट्रिक टन

उद्योगमा पञ्चकन्या ग्रुपको ५० प्रतिशत तथा बुटवलका युवा व्यवसायी रितेश सिलवाल र नारायण केसीको २५–२५ गरी ५० प्रतिशत लागत साझेदारी छ । सिलवाल र केसी टायल, मार्बल, बाथवेयर लगायत भवनको इन्टेरियर डेकोर सामग्रीका थोक विक्रेता कम्पनी सिद्धार्थभूमि इन्टरनेसनलका सञ्चालक हुन् । समान प्रकृतिको व्यवसायिक अनुभव भएकाले पञ्चकन्याले उनीहरुसँग लगानी साझेदारी गरेको हो ।





उद्योगको वार्षिक उत्पादन क्षमता ६ हजार मेट्रिक टन छ । यो नेपालको कूल यूपीभीसी बजारको ५० प्रतिशत हिस्सा हो ।

उद्योगले भविष्यमा उत्पादन वृद्धि गरेर आगामी दुई वर्षमा बजारको ३५ प्रतिशत हिस्सा ओगट्ने लक्ष्य राखेको अध्यक्ष श्रेष्ठले बताए । ‘चालु आर्थिक वर्षमा १५ प्रतिशत हिस्सा ओगट्ने लक्ष्य छ, अर्को वर्षसम्म ३५ प्रतिशत हुँदै ५ वर्षमा ५० प्रतिशत हिस्सा पञ्चकन्या डिमेक्सको पुर्‍याउँछौं,’ उद्योगका अध्यक्ष श्रेष्ठले भने, ‘हाम्रा अन्य उद्योगका उत्पादनको गुणस्तरले उपभोक्ताको विश्वास जितेका छौं, यो नयाँ उत्पादनमा पनि उस्तै विश्वास र माया पाउँछौं भन्नेमा विश्वस्त छौं ।’

उद्योगले अमेरिका, जापान, जर्मनी, चीन, भियतनाम, भारत लगायत देशबाट कच्चा पदार्थ आयात गर्छ । कच्चा पदार्थ आयातमा १० प्रतिशत भन्सार र तयारी यूपीभीसी प्रोफाइल आयातमा ३० प्रतिशत भन्सार दर हुँदा प्रतिस्पर्धा गर्न कठिन भएकाले कच्चा पदार्थ आयातमा भन्सार दर ५ प्रतिशत हुनुपर्ने सरकारलाई अध्यक्ष श्रेष्ठको आग्रह छ ।



पछिल्लो समय मुख्य शहर, बजार क्षेत्रमा यूपीभीसीका झ्याल ढोका प्रयोगको हिस्सा ४५ प्रतिशत पुगेको र यो अझै बढ्ने श्रेष्ठले बताए ।

‘सहजै पाइने, छिटो छरितो जडान हुने, हेर्दा आकर्षक, हलुंगो र मूल्य पनि काठभन्दा किफायती हुने भएकाले यूपीभीसीप्रति सामान्यदेखि सम्भ्रान्त वर्गसम्मका उपभोक्ताको आकर्षण बढ्दो क्रममा पाएका छौं’ श्रेष्ठले भन्छन्, ‘पञ्चकन्या डिमेक्सले थरिथरिका कलर रोजाइको सुविधा र युरोपियन स्टाण्डर्ड दिएपछि नेपालमा मात्र नभई भविष्यमा विदेश निर्यात पनि गर्न सक्छौं, त्यसका लागि अझ एक बिघा जग्गामा उद्योग विस्तार गर्न सकिन्छ ।’

मिस्त्री र बिक्रेतालाई तालिम

उद्योगले पञ्चकन्या डिमेक्स प्रोफाइलको गुणस्तर र विशेषताबारे जानकारी गराउन चालु वर्षदेखि यूपीभीसीको काम गर्ने मिस्त्री (फेब्रिकेटर) र विक्रेता–व्यवसायीलाई तालिम तथा परामर्श दिने योजना बनाएको छ ।



पञ्चकन्या डिमेक्सका उत्पादनहरु वातावरणमैत्री र ३० प्रतिशत विद्युत खपत कम गर्ने विशेषता भएका भए पनि आम उपभोक्ता, मिस्त्री र व्यवसायीलाई यो तथ्य जानकारी नभएकाले उपभोक्तामा जागरण ल्याउने अभियान थाल्ने उद्योगका म्यानेजिङ डाइरेक्टर रितेश सिलवालले बताए ।

‘गुणस्तरीय उत्पादन एउटा पाटो हो, हाम्रो उत्पादन उपभोक्तासम्म पुर्‍याउने मुख्य भूमिका फेब्रिकेटर र विक्रेताको हो, अब हामी उनीहरुसम्म पुग्छौं’ सिलवालले भने, ‘उहाँहरुलाई तालिम र परामर्श दिन बुटवल र काठमाडौंमा केन्द्र स्थापना गर्छौं ।’

फेब्रिकेटरलाई तालिम दिएर दक्ष बनाई सर्टिफाइड गरेर मात्र आफ्ना उत्पादनको सही तरिकाले जडान र फिटिङ गर्न पठाउने योजना रहेको सिलवालले बताए । उनका अनुसार अब हुने करिब २५ करोड लगानीको केही हिस्सा यसमै खर्च गर्ने कम्पनीको योजना छ ।

नेपालमा हाल यूपीभीसीको काम गर्ने करिब ८ सय जना मिस्त्री र ४७ व्यवसायी छन् । ८ सयमध्ये २ सय जना पञ्चकन्या डिमेक्ससँग जोडिइसकेका सिलवालले बताए । उत्पादनको गुणस्तर सुनिश्चित गर्न उद्योगमै प्रयोगशाला रहेको पनि उनले जानकारी दिए ।