— चौकीदार नियुक्तिमा असन्तुष्ट कास्की कारागारका कैदीबन्दीले धर्ना सुरु गरेका छन् । ‘क’ ब्लकमा रहेका कैदीले आइतबार बिहानैदेखि धर्ना बसेको कारागारका सूचना अधिकारी महेन्द्रबहादुर कुँवरले जानकारी दिए ।
‘शान्तिपूर्ण धर्ना बसेको अवस्था छ । मुख्य व्यक्ति यहाँ छैनन् । हिजै जिल्ला प्रहरी कार्यालय लगिएको छ । अरू बसेका छन्,’ उनले भने ।
कारागार व्यवस्थापन विभागले अजय गुरुङलाई चौकीदार बनाउन कारागार कार्यालय कास्कीलाई आइतबार सिफारिस गरेको थियो । अर्का कैदी प्रकाश गुरुङ पक्षधर यो निर्णयमा असहमत छन् । ‘क’ ब्लकमा रहेका ३ सय ६६ मध्ये ३ सय ६२ जना कैदीबन्दीले प्रकाशलाई चौकीदार बनाउनुपर्ने माग राखेर सोमबार गृहमन्त्री लेखकलाई पत्र पनि पठाएका छन् ।
नवनियुक्त चौकीदार अजयले कैदीबन्दीको हकहित तथा सुरक्षा गर्न नसक्ने, पक्षपात र निरंकुश कार्यशैली रहेको, कैदीबन्दीको आर्थिक शोषण हुने, सुशासन कायम नरहने प्रकाश पक्षधर कैदीबन्दीको जिकिर छ । आर्थिक चलखेल गरेर चौकीदार नियुक्त गरिएकाले त्यसको पनि छानबिन गर्न उनीहरूले माग गरेका छन् । माग पूरा नभएसम्म नयाँ चौकीदारलाई बहिष्कार गर्ने, आमरण अनसन बस्ने कैदीबन्दीले पत्रमा उल्लेख गरेका छन् ।
आर्थिक वर्ष ०८२–८३ का लागि चौकीदारमा कास्कीबाट अजय गुरुङ, प्रकाश गुरुङ र प्रशान्त थापाको नाम सिफारिस भएको थियो । अजय र प्रकाश कर्तव्य ज्यानसम्बन्धी कसुर र प्रशान्त लागुऔषधसम्बन्धी कसुरमा कारागार जीवन बिताइरहेका छन् ।
कारागारमा प्रकाशलाई चौकीदार बनाउनुपर्ने पक्षमा ठूलो संख्या देखिएको छ । आइतबार प्रकाशलाई चौकीदार बनाउनुपर्ने पक्षमा रहेका युवाले दुई घण्टा नाराबाजी गरेका थिए । शान्ति सुरक्षाको कारण देखाएर अजय र प्रकाशलाई जिल्ला प्रहरी कार्यालय कास्कीको हिरासतमा लगिएपछि माहोल शान्त भएको थियो । आइतबार बिहानदेखि प्रकाश पक्षधर कैदीबन्दी धर्नामा बसेका हुन् ।
कास्की कारागारमा ३ वटा ब्लक छन् । त्यसमध्ये ‘क’ ब्लकमा ३ सय ६६, ‘ख’ ब्लकमा ४ सय २० जना र महिला ब्लकमा २ नाबालकसहित ३४ जना कैदीबन्दी छन् ।
