: अखिल नेपाल फुटबल संघ (एन्फा)सँगको विवादपछि नेपाली महिला फुटबल टिमका प्रमुख प्रशिक्षक प्याट्रिक डे वाइल्डले राजीनामा दिएका छन्। उनको राजीनामा पत्र केहीदिन अघि इमेलमार्फत आएको एन्फा स्रोतले बताएको छ।
उज्वेकिस्तानमा एसियन कप छनोटका क्रममा एन्फासँग विवाद भएपछि प्रमुख प्रशिक्षक प्याट्रिक नेपाल फर्किएका थिएनन्। उनले एक अन्तर्वार्ता एन्फालाई विभिन्न आरोप लगाएका थिए। उनले एन्फा नसुध्रिए आफू नेपाल नफर्कने भन्दै उज्बेकिस्तानबाट आफ्नो देश बेल्जियम गएका थिए।
तर एन्फाले पत्रकार सम्मेलन गर्दै कप्तान चयनमा प्रमुख प्रशिक्षक प्याट्रिक एकतर्फी ढंगले अघि बढ्दा विवाद भएको जनाएको थियो।
एसियन कप छनोटका क्रममा भएको घटनाक्रमबारे जानकारी गराउन एन्फाले प्याट्रिकलाई पत्र पठाएको थियो। तर उनले त्यसको जवाफमा राजीनामा बुझाएका हुन्।
प्रो लाइसन्स प्राप्त प्याट्रिक गत जेठ २२ गते नेपाली राष्ट्रिय महिला फुटबल टिमको मुख्य प्रशिक्षक नियुक्त भएका थिए।
एसियन कप छनोटमा नेपालले श्रीलंका र लाओसमाथि सहज जित निकालेको थियो। तर उज्बेकिस्तानसँग ३–३ गोलको बराबरी खेलेपछि टाइब्रेकरमा चुक्दा नेपाल एसियन कपमा छनोट हुन सकेको थिएन।
