: अविरल वर्षाका कारण पहिरोले घर भत्काउँदा रोल्पामा वृद्धको मृत्यु भएको छ। जिल्लाको उत्तरी थबाङ गाउँपालिका-४ थापाखर्कका ७२ वर्षीय गोठे घर्तिमगरको मृत्यु भएको प्रहरीले जनाएको छ।
आइतबार बिहान ६ बजे भान्छा कोठामा बसिरहेका घर्तीमगरको पहिरोले पुरेर मृत्यु भएको जिल्ला प्रहरी कार्यालयले जनाएको हो। पहिरोले १५ मिटर तल बगाएर घर्तीमगरलाई पुरेको हो। पहिरोमा पुरै शरीर पुरिएको र खुट्टा मात्र देखिएको अवस्था थियो।
घटनाबारे बिहान साढे १० बजे प्रहरीलाई फोनमार्फत जानकारी भएपछि प्रहरी घटनास्थल तर्फ हिँडेको थियो। इलाका प्रहरी कार्यालय उवाबाट प्रहरी सहायक निरीक्षक केशवराज बुढाथोकीको नेतृत्वमा ६ जना प्रहरी र इलाका प्रहरी कार्यालय थबाङबाट प्रहरी सहायक निरीक्षक रामु पौडेलको नेतृत्वमा ४ जना प्रहरी घटनास्थल पुगेका थिए।
प्रहरी घटनास्थल पुगेपछि जनप्रतिनिधि र गाउँले सहितको संयुक्त टोलीले दिउँसो सवा १५ बजे शव निकालेको थियो। मृतकका श्रीमती र छोरी सुरक्षित रहेको प्रहरीले जनाएको छ। घरको भान्छा कोठा पूर्णरूपमा क्षतिग्रस्त छ।
