— जर्मनीले पेनाल्टी सुटआउटमा शनिबार फ्रान्सलाई ६–५ ले पराजित गर्दै वुमेन्स युरो २०२५ को सेमिफाइनल यात्रा तय गरेको छ । अतिरिक्त समयको खेल १–१ को बराबरीमा टुंगेपछि टाइब्रेकरको आवश्यकता परेको हो ।
जर्मनीले खेलको अधिकांश समय १० खेलाडीमा सीमित रहेर खेलेको थियो ।
जर्मन जितमा नायक रहे, एना काटरिन बर्गर । उनले एमले माज्री र एलिस सोमबाथको पेनाल्टी बचाइन् र आफ्नो टिमलाई अन्तिम चारमा पुर्याइने । अब त्यस चरणमा उसको सामना हुनेछ, स्पेनसँग । जर्मनको विश्व च्याम्पियनविरुद्धको खेल बुधबार ज्युरिचमा हुनेछ ।
महिला फुटबलको ठूला प्रतियोगितामा जर्मनी अहिलेसम्म फ्रान्सको हातबाट पराजित भएको छैन र यही क्रमलाई कायम राख्दै सुरुआती १५ मिनेटभित्र एक गोलले पछाडि रहेको स्थितिबाट खेलमा फर्केको हो । त्यति बेलासम्म जर्मनी १० खेलाडीमा समेत सीमित भइसकेको थियो ।
खेलपछि बर्गरले भनिन्, ‘म त खेल ९० मिनेटमै छिनोफानो होस भन्ने चाहन्छु । पूरा १ सय २० मिनेटको खेलमा पूरा टिमले निकै मिहिनेतले खेलेको थियो । खालि मैले केही योगदान मात्र दिएकी हुँ । त्यसैले यो जितको श्रेय टिमलाई जान्छ, मलाई होइन्, भलै खेलको निर्णय पेनाल्टीमा भयो ।’
क्याथरिन हेन्ड्रिचले रातो कार्ड खाएसँगै ग्रेस गेयोरोले गोल गर्दै फ्रान्सलाई सुरुआती अग्रता दिलाइन् । स्जोके नुसकेनले सुरुमा जर्मनीका लागि पेनाल्टीबाट गोल गर्न चुकिन्, तर पछि उनी आफैंले बराबरी गोल गर्दै जर्मनीलाई टिममा फर्काइन् । फ्रान्स भने पछिल्ला युरोका १० संस्करणध्ये आठमा क्वाटरफाइनलमै रोकिएको छ ।
‘मलाई के लाग्दैन भने हाम्रा खेलाडीले सक्दो प्रयास गरेनन् । सबैले के बुझ्नुपर्छ भने जर्मनी फिफा वरीयताको तेस्रो स्थानमा भएको टिम हो । जर्मनीले पछाडि बसेर रक्षात्मक खेल्यो । त्यसलाई तोड्न सजिलो थिएन । जर्मनीले हामीलाई अन्त्यसम्म गाह्रो स्थितिमा राख्यो,’ फ्रान्सेली प्रशिक्षक लुरेन्ट बोनाडेइले भने ।
क्वाटरफाइनल अगाडि जर्मनीले डिफेन्डर जिगली ग्वानलाई चोट र क्यार्लोट वामसरालाई प्रतिबन्धका कारण गुमाएको थियो । यस्तै स्टार खेलाडी लेआ सलरलाई सुरुमा बेञ्चमा राखिएको थियो । त्यसमाथि १३ औं मिनेटमा हेन्डरिचले रातो कार्ड खाएपछि जर्मनी सुरुमै दबाबमा थियो, तर यो टिम कति हार नखाने थियो भने यसले उल्टै फ्रान्सलाई दबाबमा राख्यो ।
