— दूरसञ्चार सेवा प्रदायक एनसेलले पछिल्लो एक महिनायता सञ्चालनमा ल्याएको ‘सधैं अन करोडपति’ योजना नियामकको हस्तक्षेपपछि बन्द भएको छ । आफ्ना उत्पादन तथा योजना प्रवर्द्धन गर्न विभिन्न कम्पनीले ग्राहक योजना ल्याउने अभ्यास रहेकोमा नेपाल दूरसञ्चार प्राधिकरणले एनसेलको योजनामा अचानक हस्तक्षेप गरेको हो ।
एनसेलले प्राधिकरणलाई जानकारी दिएर नै आफ्ना ग्राहकलाई पुरस्कृत गर्ने उद्देश्यले योजना सुरु गरिएको दाबी गरेको छ । साउन १ देखि योजना बन्द गरिए पनि विजेता घोषणा भइसकेका ग्राहकलाई पुरस्कार प्रदान गर्ने प्रक्रियालाई भने निरन्तरता दिइने एनसेलले उल्लेख गरेको छ । ‘यसबाट ग्राहकवर्गमा पर्न गएको असुविधाप्रति हामी क्षमाप्रार्थी छौं,’ एनसेलले भनेको छ, ‘सञ्चालन अवधिभित्र यस योजनामा सहभागिता जनाउनु भएका ग्राहकलाई कम्पनीको प्रतिबद्धताबमोजिम विजेता घोषणा गरी पुरस्कृत गरिने व्यहोरा अनुरोध गर्दछौं ।’
नियामक प्राधिकरणले भने एनसेलको ग्राहक योजनालाई चिट्ठा कार्यक्रम भनेको छ । चिट्ठा ऐन २०२५ अनुसार यस्तो योजना बन्द गर्न निर्देशन दिइएको प्राधिकरणका प्रवक्ता मीनप्रसाद अर्यालले बताए ।
‘चिट्ठा ऐनले यस्ता योजना गर्न पाइँदैन भनेको छ,’ अर्यालले भने, ‘एनसेललाई हामीले बन्द गर्न भनेका हौं, किनभने यो ग्राहकको हितमा देखिएन ।’
एनसेलले करोडपति योजनाबारे जानकारी दिएको र त्यस बखत नै रोक्नुपर्नेमा ढिलाइ भएको प्राधिकरणका अधिकारी बताउँछन् । चिट्ठा खोलिसकेको विषयमा के गर्ने भन्ने विषयमा पनि प्राधिकरणले अध्ययन गरिरहेको र अबको १५/२० दिनपछि निर्णय गरिने जनाइएको छ ।
एनसेलले ‘सधैं अन करोडपति योजना’ चार साता पूर्ण रूपमा सञ्चालन गरिसकेको छ । पाँचौं साताको कार्यक्रम चलिरहेका बेला प्राधिकरणले यसलाई तत्काल बन्द गर्न निर्देशन दिएको हो । पाँचौं साताको आइतबारदेखि बुधबारसम्म टिकट जित्नेहरूलाई बिहीबार प्रत्यक्ष प्रसारण गरी विजेता घोषणा गरिएको थियो । बम्पर पुरस्कारस्वरूप १ करोड रुपैयाँका विजेतासमेत घोषणा भइसकेको छ ।
नियामकले बन्द गर्न भने पनि विजेता घोषणा भएकालाई पुरस्कार दिएर जिम्मेवार कम्पनीका रूपमा अघि बढ्ने एनसेलले सूचनामा भनेको छ । कम्पनीले हालसम्म कुल ५० जना विजेता घोषणा गरेको छ भने
तीमध्ये २४ जनाले जनही १ लाख रुपैयाँ पुरस्कार प्राप्त गरिसकेका छन् । बाँकी २६ जनाको प्रमाणीकरण प्रक्रिया जारी छ । प्रमाणीकरणमा कम्पनीले चिट्ठा नम्बरका आधारमा विजेता पहिल्याउने र उनीहरूले एनसेलको सिम लिए/नलिएको पुष्टि गरेर सम्पर्क गर्ने गरेको छ ।
