— शनिबारदेखि सुरु भएको अविरल वर्षाका कारण पूर्वोत्तर रोल्पाको उवामा पहिरो खस्दा घरमा च्यापिएर एकजनाको ज्यान गएको छ ।
प्रहरीका अनुसार शनिबार बेलुका ६ बजेतिर थबाङ गाउँपालिका–४ उवास्थित थापाखर्कमा स्थानीय ७२ वर्षीय गोठे घर्तीमगरको घरमाथिबाट पहिरो खस्दा उनको मृत्यु भएको हो । उनको घर ढुंगा र माटोबाट बनाइएको थियो
अत्यधिक वर्षा भइरहेका बेला घरभित्र रहेका उनलाई घरसमेत बगाएर झन्डै ३० मिटर मुनि पुर्याएको थियो । परिवारका अन्य ५ जना भने घटना हुँदा घर बाहिर भएकाले सुरक्षित अवस्थामा भएको उक्त वडाका अध्यक्ष हिक्मतसिंह घर्तीमगरले बताए ।
जिल्ला प्रहरी कार्यालयका सूचना अधिकारी रोहितकुमार शाहीका अनुसार शव आइतबार दिउँसो सवा ३ बजेतिर पहिरोबाट निकालिएको हो । घटनाबारे थप अनुसन्धान गर्न थबाङस्थित इलाका प्रहरी कार्यालयका इन्चार्ज प्रहरी निरीक्षक रामु पौडेल र इलाका प्रहरी सुलिचौरका इन्चार्ज प्रहरी निरीक्षक अरुण तामाङ नेतृत्वको टोली उवातर्फ गएको छ । उक्त घटनास्थल रोल्पा सदरमुकाम लिबाङबाट झन्डै ६० मिटर उत्तरपूर्वमा पर्छ ।
घटनास्थल दुर्गममा रहेकाले शव पोस्टमार्टमका लागि अस्पताल पुर्याउन समस्या भएको वडाध्यक्ष घर्तीमगरले बताए । उनले जिल्लास्थित सुरक्षा अधिकारीहरुसँग समन्वय गरेर छिमेकी जिल्ला रुकुम पूर्वको अस्पतालमा लैजान सजिलो हुने भएकाले समन्वय गरिएको बताए ।
