: गृहमन्त्री रमेश लेखकले देशमा शान्ति सुरक्षाको स्थिति अनुकूल रहेको बताएका छन्। शुक्रबार सिंहदरबारमा बसेको राष्ट्रिय सभा अन्तर्गतको संघीयता सबलीकरण तथा राष्ट्रिय सरोकार समितिको बैठकमा उनले एक वर्ष अघिको तुलनामा अहिले शान्ति सुरक्षाको स्थिति अनुकूल रहेको बताएका हुन्।
मन्त्री लेखकले संघीय व्यवस्थालाई समाप्त गर्ने अवस्था नरहेको र संविधानको सुरक्षाका लागि काम गरिरहेको धारणा राखे। अपराध न्यूनीकरण गर्न सुरक्षा निकायले गम्भीरतापूर्वक काम गरिरहेको उनले बताए।
गृहमन्त्री लेखकले अपराधका पुराना घटनालाई समेत अहिले प्रहरीले अनुसन्धान गरेर कारबाहीको दायरामा ल्याएको उल्लेख गरे। आर्थिक अपराधहरू समेत प्रहरीले अनुसन्धान गर्नुपर्ने विषय बनेकाले केन्द्रीय अनुसन्धान व्युरोभित्र छुट्टै निकाय गठन गरिएको उनले बताए।
गृहमन्त्री लेखकले मुलुकमा शान्ति सुरक्षा कायम गर्न सुरक्षा निकायलाई प्रयाप्त स्रोत साधन उपलब्ध गराएर व्यवसायीक बनाउन सरकार गम्भीर रहेको जिकिर गरे।
