: वीरगन्ज नाकामा रहेका दुवै भन्सार कार्यालयको राजस्व संकलन बढेको छ। गत आर्थिक वर्ष २०८१/८२ मा वीरगन्ज भन्सार कार्यालय र सिर्सिया सुक्खा बन्दरगाह भन्सार कार्यालय भन्सार विभागले दिएको लक्ष्य पूरा गर्न नसके पनि अघिल्लो आर्थिक वर्ष २०८०/८१ को भन्दा बढी नै राजस्व संकलन गरेका छन्।
नेपालमा हुने आयात–निर्यातको अन्तर्राष्ट्रिय कारोबारको ७० प्रतिशत हिस्सा वीरगन्ज नाकाबाटै हुने गरेको छ। यस्तै देशको कूल राजस्व संकलनमा वीरगन्ज नाकामा रहेका दुवै भन्सार कार्यालयको योगदान ४० प्रतिशतभन्दा बढी नै रहने गरेको छ।
गत आर्थिक वर्ष २०८१/८२ मा वीरगन्ज भन्सार कार्यालयले १ खर्ब ७५ अर्ब ९३ करोड ६५ लाख रुपैयाँ राजस्व संकलन गरेको छ। भन्सार विभागले गत आर्थिक वर्ष २०८१/८२ का लागि २ खर्ब १८ अर्ब ९५ करोड ५९ लाखको लक्ष्य दिएकोमा वीरगन्ज भन्सारले लक्ष्यको ८० दशमलव ३५ प्रतिशत राजस्व संकलन गरेको प्रमुख भन्सार प्रशासक दीपक लामिछानेले बताए।
अघिल्लो आर्थिक वर्ष २०८०/८१ मा भने वीरगन्ज भन्सारले लक्ष्यको ६४ दशमलव ०१ प्रतिशत मात्रै अर्थात १ खर्ब ५७ अर्ब ४० करोड ३१ लाख २८ हजार रुपैयाँ राजस्व संकलन गरेको थियो। अघिल्लो आर्थिक वर्ष २०८०/८१ को भन्दा गत आर्थिक वर्ष २०८१/८२ मा १६ प्रतिशत बढी राजस्व संकलन भएको लामिछानेले बताए।
आर्थिक वर्ष २०७९/८० मा लक्ष्यको ६० दशमलव १९ प्रतिशत मात्र अर्थात १ खर्ब ५७ अर्ब ८ करोड रुपैयाँ राजस्व संकलन गरेको वीरगन्ज भन्सारले त्यसअघिको आर्थिक वर्ष २०७८/७९ मा भने लक्ष्य भन्दा शून्य दशमलव ५४ प्रतिशतले बढि नै अर्थात् २ खर्ब ४ अर्ब १२ करोड २७ लाख रुपैयाँ राजस्व संकलन गरेको थियो। तर त्यसअघिका पाँच वर्ष (आर्थिक वर्ष २०७२/०७३ देखि २०७७/७८ सम्म) मा भने वीरगन्ज भन्सार राजस्व असुलीको लक्ष्य पुरा गर्न लगातार असफल नै भएको थियो।
यता वीरगन्ज नाकामै रहेको सिर्सिया सुक्खा बन्दरगाह भन्सार कार्यालयको पनि गत आर्थिक वर्ष २०८१/८२ मा राजस्व संकलन बढेको छ। सुक्खा बन्दरगाह भन्सारले गत आर्थिक वर्ष २०८१/८२ मा ४९ अर्ब ८२ करोड ३७ लाख १८ हजार रुपैयाँ राजस्व संकलन गरेको छ। गत आर्थिक वर्ष २०८१/८२ मा ६० अर्ब चार करोड ८७ लाख ९७ हजारको लक्ष्य पाएको सुक्खा बन्दरगाह भन्सारले लक्ष्यको ८२ दशमलव ९७ प्रतिशत राजस्व संकलन गरेको हो।
अघिल्लो आर्थिक वर्ष २०८०/८१ मा भने सुक्खा बन्दरगाह भन्सारले लक्ष्यको ७१ दशमलव.७५ प्रतिशत मात्र अर्थात ४७ अर्ब ३१ करोड रुपैयाँमात्र राजस्व संकलन गरेको थियो। त्यसअघिको आर्थिक वर्ष २०७९/८० मा लक्ष्यको ६२.८८ प्रतिशत मात्रै अर्थात ४२ अर्ब ४० करोड २२ लाख ९२ हजार राजस्व संकलन गर्न सकेको सुक्खा बन्दरगाह भन्सारले आर्थिक वर्ष २०७८/७९ मा भने लक्ष्यको ९४.९८ प्रतिशत राजस्व संकलन गरेको थियो।
वीरगन्ज भन्सार कार्यालयका प्रमुख भन्सार प्रशासक दीपक लामिछानेले गत आर्थिक वर्ष २०८१/८२ मा समग्रमा भारत तथा तेस्रो मुलुकबाट मालसामानको आयात बढेका कारणले राजस्व संकलनमा सुधार देखिएको बताए। उनले आर्थिक वर्ष २०८१/८२ मा अघिल्लो आर्थिक वर्ष २०७९/८० को भन्दा १६ प्रतिशत बढीले राजस्व संकलन भएको बताए।
राजस्व बढी उठ्ने इन्धन, औद्योगिक कच्चा पदार्थ, निर्माण सामग्री लगायतको आयात बढेका कारण राजस्व संकलन पनि बढेको उनले बताए। सरकारले दिएको राजस्व संकलनको लक्ष्य त फेरि पनि पुरा भएन नि ? भन्ने प्रश्नमा भने लामिछानेले जवाफ दिँदै भने,‘समग्र देशको अर्थ व्यवस्था नै अहिले पहिलाको जस्तो पूर्ण लयमा फर्किन सकेको छैन। त्यसकारण सरकारले दिएको लक्ष्य भने पुरा हुन सकेन। यद्यपि अघिल्ला आर्थिक वर्षको तुलनामा अहिले भन्सार राजस्व संकलनमा निकै सुधार देखिएको छ।’
