— क्रोएसियाली कप्तान लुका मोड्रिचले सोमबार एसी मिलानसँग एक वर्षको अनुबन्ध गरेको इटालीको सिरी ‘ए’ क्लबले जनाएको छ । गत साता मात्रै मिलानका प्रशिक्षक मासिमिलियानो एलेग्रीले सन् २०१८ को बालोन डी’अर विजेता ३९ वर्षीय खेलाडी रियल म्याड्रिडबाट सान सिएरो आउने बताएका थिए ।
उनी सेप्टेम्बरमा ४० वर्षमा पुग्नेछन् । सन् २०१२ मा उनी टोटनहमबाट रियल गएका थिए । रियलसँगको अनुबन्ध यो सिजन समाप्त भएसँगै स्पेन छाड्ने घोषणा गरेपछि उनी इटाली जाने सम्भावना रहेको बताइएको थियो । उनी मिलान पुगिसकेका छन् ।
कुल १९ पल्टको सिरी ‘ए’ विजेता क्लबले भनेको छ, ‘सन् २०२६ को जुन ३० सम्म मोड्रिचले क्लबसँग अनुबन्ध गरेका छन् र यो घोषणा गर्न पाउँदा हामी खुसी छौं । यो सम्झौताअनुसार अनुबन्ध एक वर्ष बढाउन सकिनेछ ।’ मोड्रिच आफैंले पनि मिलानसँग आबद्ध हुन पाएको खुसी व्यक्त गरेका छन् ।
उनले भनेका छन्, ‘मैल मिलानमा आफ्नो खेलजीवनको नयाँ अध्याय सुरु गर्दै छु र म यसका लागि खुसी छु ।’ एलेग्रीको नेतृत्वमा मिलानले सन् २०११ मा लिग उपाधि जितेको थियो । उनी सन् २०१० देखि २०१४ सम्म मिलानमा थिए ।
