— इजरायलले पूर्वी लेबनानको बेका उपत्यकामा गरेको हवाई आक्रमणमा कम्तीमा १२ जनाको मृत्यु भएको लेबनानको सरकारी समाचार संस्था नेसनल न्युज एजेन्सी (एनएनए) ले जनाएको छ । इजरायली सेनाले लेबनानको लडाकु समूह हिजबुल्लाहका लक्ष्यमा प्रहार गरेको पुष्टि गरेको छ । मृतकमध्ये सात जना सिरियाली छन् । आक्रमणमा परी आठ जना घाइते भएका छन् ।
इजरायली सेनाले एक विज्ञप्ति जारी गर्दै ‘हिजबुल्लाहको रेडवान बल’ विरुद्ध ‘हवाई हमला’ गरिएको उल्लेख गरेको छ । हमलामा ‘आतंकवादी आक्रमणको योजना बनाउने र कार्यान्वयन गर्ने’ प्रशिक्षण केन्द्रहरूलाई निसाना बनाएको इजरायली सेनाले दाबी गरेको छ । तर, लेबनानी सञ्चार संस्थाले उत्तरी बेका उपत्यकाको वादी फराहस्थित सिरियाबाट विस्थापितहरूको एक शिविरमा हवाई हमला गरिएको र त्यसमा १२ जनाको मृत्यु भएको दाबी गरेको छ ।
इजरायल र हिजबुल्लाहबीच नोभेम्बरमा युद्धविराम सम्झौता भए पनि इजरायली आक्रमणहरू जारी छन् । युद्धविराम सम्झौताअनुसार हिजबुल्लाहले आफ्ना लडाकु लितानी नदीको उत्तरतर्फ सीमित गर्नुपर्ने र इजरायलले पाँच वटा रणनीतिक स्थानबाहेक अन्य स्थानबाट सेना फिर्ता गर्नुपर्ने थियो ।
