: पूर्वराजा ज्ञानेन्द्र शाहलाई अबदेखि ‘श्री ५ महाराजाधिराज’ नलेख्ने कागज गराएर प्रहरीले उनका निजी सचिव पाठकलाई छाडेको छ ।
जिल्ला प्रहरी परिसर काठमाडौंका एसपी अपिल बोहाराले उनलाई कागज गराएपछि शुक्रबार साँझ परिवारको जिम्मा लगाइएको जानकारी दिए । संविधानले नचिन्ने सम्बोधनसहित सामाजिक सञ्जालमा पोस्ट र विज्ञप्ति निकालेको भन्दै उनलाई प्रहरीले सोधपुछका लागि बोलाएको थियो ।
जिल्ला प्रहरी परिसर काठमाडौंका प्रमुख विश्व अधिकारीका अनुसार, उनीविरुद्ध जनगुनासो आइरहेको थियो । पाठकले पूर्वराजाको विज्ञप्ति निकाल्ने बेला पूर्वराजालाई श्री ५ महाराजाधिराज नै लेख्ने गरेका छन्, जुन संविधानअनुसार छैन ।
पूर्वराजाको संवाद सचिव पाठकले गत असार १३ गते सार्वजनिक गरेको प्रेस विज्ञप्तिमा श्री ५ महाराजाधिराज ज्ञानेन्द्र वीरविक्रम शाहदेवको ७९औं शुभजन्मोत्सव मनाउने भन्दै सूचना जारी गरेका थिए । संवाद सचिवालयबाट हरेक पटक प्रकाशित हुने सूचनामा उनले पूर्वराजालाई श्री ५ महाराजाधिराज नै सम्बोधन गर्ने गरेका थिए ।
