: वैदेशिक रोजगारीको सिलसिलामा साउदी अरबिया पुगेका एकै कम्पनीका ४६९ जना अलपत्र परेका नेपालीमध्ये २ सय ६२ जना स्वदेश फिर्ता भएका छन् । साउदी अरबको जुबेल सहरमा रहेको सेन्दान इन्टरनेशनल कम्पनी लिमिटेड नामक कम्पनी बन्द भएपछि उनीहरू अलपत्र परेका थिए ।
नेपाली दूतावासका अनुसार अलपत्र ४६९ जनाले आफूहरू कम्पनी बन्द भएको कारण अलपत्र परेको र उद्धार गरिदिन दूतावासलाई निवेदन दिएलगत्तै दूतावासले सम्बन्धित कम्पनी र निकायसँग छलफल गरि स्वदेश फिर्ताको लागि प्रकिया अगाडि बढाएको थियो। जसअनुसार हालसम्म २ सय ६२ जना स्वदेश फिर्ता भएका छन् भने १ सय ४७ जना लोकल ट्रान्सफर गरि काममा लागेका छन् । साथै ३१ जना कामको पर्खाइमा रहेका छन् भने १३ जना स्वदेश फिर्ताको पर्खाइमा रहनुको साथै २५ जनाको बहिर्गमन भिसाको प्रकियामा रहेको बताए।
पीडितहरू साउदी अरबको विभिन्न सहरमा छरिएर बसेका थिए । उनीहरूले दुई महिनादेखि नौ महिनासम्मको तलब समेत पाएका छैनन्। नेपाली राजदूत डा. नरेशप्रसाद ढकालले अलपत्र परेका नेपालीको उद्धारका लागि नेपाली दूतावास टिम नै सम्बन्धित कम्पनी र साउदी सरकारसँग समन्वय गरि केही पीडितहरूलाई स्वदेश पठाएको र पीडितहरूको इच्छाअनुसार लोकल ट्रान्सफर गरि अन्य कम्पनीमा काममा लाग्नुको साथै अन्यको प्रकियामा रहेको बताए।
साथै अलपत्र परेका नेपालीहरूलाई आवश्यकता अनुसार सहयोग गर्ने सम्पूर्ण समुदायलाई धन्यवाद समेत व्यक्त गरेका छन्। पीडितको बारेमा साउदीमा रहेको भातृसंगठन नेपाली जनप्रगतिशील मञ्च परिवारले समेत पीडितहरूको उद्धारको लागि दूतावासलाई आह्वान गर्नुको साथै अलपत्र भए परेका नेपालीको आवासमा पुगेर आवश्यक खाद्यान्न र साधारण औषधि वितरण गरी सहयोग गरेका थिए। साथै ४६९ जना पीडितमध्ये २२६ जनाले स्वदेश फिर्ताको लागि लिखित रूपमा निवेदन दिएका। २४३ जनाले आफूहरू काम पाएमा सम्बन्धित कम्पनीमा लोकल ट्रान्सफरको लागि आह्वान गरेका थिए भने अलपत्र पर्नेमा प्रायजसो सो कम्पनीमा दुई वर्षभन्दा बढी काम गरेका नेपाली कामदारहरू रहेका थिए ।
अलपत्र परेका नेपालीहरू नेपालमा रहेको फेलिसिटी इन्टरनेशनल इम्प्लोयमेन्ट एजेन्सी प्रालि मेनपावरमार्फत् साउदी आएका थिए।
