: मोरङको रंगेलीबाट हवाई फायर गरेर प्रहरीले आइतबार दिउँसो ठूलो परिणाममा लागुऔषध ब्राउन सुगरसहित ३ जनालाई पक्राउ गरेको छ।
लागुऔषध नियन्त्रण ब्युरो काठमाडौंसहितको टोलीले १ राउण्ड हवाई फायर गरेर रंगेली नगरपालिका-८ मा स्थित डिल्लीराम श्रेष्ठको घरबाट ३ जनालाई पक्राउ गरेको हो। पक्राउ पर्नेमा १ जना भारतीय महिला पनि छन्।
मोरङ प्रहरी प्रवक्ता डीएसपी कोपिला चुँडालका अनुसार रंगेली–८ घर भएर सोही वडाका डिल्लीराम श्रेष्ठको घरमा भाडामा बस्ने ५४ वर्षीय कृत्यानन्द ठाकुर, ३० वर्षीय सुशील बुढाथोकी र भारत अररिया जिल्लाको कुर्शाकट्टा घर भएकी ५० वर्षीय हसिना भन्ने बिजली खातुनलाई पक्राउ गरिएको छ।
पक्राउ गर्ने क्रममा प्रहरीले १ राउण्ड हवाइ फायर पनि गरेको छ। ठाकुरको डेराबाट ४ सय २५ ग्राम ब्राउन सुगरजस्तो देखिने वस्तु, नगद १ लाख २१ हजार र ४ वटा आइफोन बरामद भएको डीएसपी चुँडालले बताइन्।
लागुऔषध कारोबार भइरहेको सूचनाका आधारमा नेपाल प्रहरीको लागुऔषध अनुसन्धान ब्युरो काठमाडौं, लागुऔषध अनुसन्धान ब्युरो विराटनगर र इलाका प्रहरी कार्यालय रंगेलीबाट टोली खटिएको थियो।
