: रूसले युक्रेनमाथि अहिलेसम्मकै ठूलो हवाई आक्रमण गरेको छ। शुक्रबार रूसका सरकारी प्रवक्ताले युक्रेनमाथिको जारी युद्धको सन्दर्भमा कुनै कूटनीतिक समाधान सम्भव नरहेको खुलासा गरेसँगै रुसले उक्त आक्रमण गरेको हो।
अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमिर पुटिनबीचको टेलिफोन वार्ता निष्कर्षविहीन भएको केही घण्टापछि रूसले उक्त आक्रमण सुरू गरेको बीबीसीले जनाएको छ। किभसहित युक्रेनका अन्य सहरहरूमा रातभर ड्रोन र विस्फोटहरूको आवाज गुञ्जिएको थियो। त्यससँगै युक्रेनी हवाई सुरक्षा प्रणाली सक्रिय गरिएको थियो।
क्रेमलिनका प्रवक्ता दिमित्री पेस्कोभले पत्रकारसँगको कुराकानीमा भने, 'हामी हाम्रो उद्देश्यहरू हासिल गर्न विशेष सैन्य अभियानलाई प्राथमिकता दिइरहेका छौं, तर राजनीतिक र कूटनीतिक समाधान अझ उपयुक्त हुनेछ। तर वर्तमान अवस्थामा कुनै कूटनीतिक समाधान सम्भव छैन।'
राष्ट्रपति ट्रम्पले पुटिनसँगको संवादमा युद्ध अन्त्यको विषयमा कुनै प्रगति नभएको जानकारी दिएका छन्। युक्रेनी राष्ट्रपति भोलोदिमिर जेलन्स्कीले प्रतिक्रिया दिँदै भने, 'रूसले एकपटक फेरि प्रमाणित गर्यो कि उसले युद्ध र आतंकको अन्त्य गर्ने कुनै तयारी गरेको छैन। यदि अन्तर्राष्ट्रिय समुदायले ठोस दबाब नदियो भने रूसको विनाशकारी व्यवहारमा परिवर्तन आउन गाह्रो देखिन्छ।'
रूसी सेनाले डोनेत्स्क क्षेत्रमा एक गाउँ नियन्त्रणमा लिएको दाबी गर्दै युक्रेनी भूभागमा थप दबाब सिर्जना गरेको छ। आक्रमणका क्रममा पोल्यान्डको किभस्थित दूतावासमा क्षति पुगे पनि त्यहाँका कर्मचारीहरू सुरक्षित रहेको जनाइएको छ। युक्रेनी वायु सेनाका अनुसार यो आक्रमण युक्रेनमाथि हालसम्मकै सबैभन्दा ठूलो हो। यसमा ५३९ ड्रोन र ११ मिसाइल प्रयोग गरिएका थिए, जसबाट कम्तीमा २३ जना घाइते भएका छन्।
