: हमासले गाजामा युद्धविराम र बन्धकको रिहाइका लागि अमेरिकी नयाँ प्रस्तावलाई आधिकारिक रूपमा प्रतिक्रिया दिनु अघि अन्य प्यालेस्टिनी समूहसँग परामर्श गरिरहेको बताएको छ।
अमेरिकी राष्ट्रपति डोनाल्ड ट्रम्पले शुक्रबार बिहान हमासले आफ्नो योजनामा सहमति जनाए–नजनाएको २४ घण्टाभित्र थाहा पाउने भनेका थिए।
यसअघि मंगलबार ट्रम्पले गाजामा ६० दिने युद्धविरामलाई अन्तिम रूप दिन आवश्यक पर्ने सर्तमा इजरायल सहमत भएको बताएका थिए।
यसैबीच इजरायली सेनाले गाजा पट्टीका धेरै स्थानमा बमबारी जारी राखेको छ।
उद्धारकर्मीले बिहीबार इजरायली गोलाबारीबाट गाजामा कम्तीमा ६९ जनाको मृत्यु भएको बताएका छन्।
हमासको नागरिक रक्षा एजेन्सीका अनुसार गाजामा विस्थापित परिवारको आश्रयस्थल नजिकै भएको हवाई आक्रमणमा १५ जनाको मृत्यु भएको छ। तीमध्ये धेरैजसो महिला र बालबालिका छन्।
इजरायली सेनाले त्यहाँ अवस्थित एक प्रमुख हमास कार्यकर्तालाई लक्षित गरेको बताएको छ।
अक्टोबर ७, २०२३ मा हमासले इजरायलमा आक्रमण गरेको थियो। यसमा करिब १,२०० जना मारिएका थिए। यसपछि इजरायलले गाजामा सैन्य कारबाही सुरु गरेको थियो।
