। बागमती प्रदेश सरकार आगामी आर्थिक वर्ष २०८२÷८३ का लागि ल्याएको बजेटमाथि सांसद र दलहरुले उठाएका सवालको कार्यान्वयनमा सहमत भएको छ ।
आज बिहीवार दिउँसो प्रदेशसभा बैठक सञ्चालन पूर्व सरकारले प्रदेशसभामा प्रतिनिधित्व गर्ने दलहरुबीच बजेटमा देखिएका त्रुटि सच्याउनेदेखि अनाधिकृत रुपमा बजेटमा समावेश भएका आयोजाहरुमाथि छानबिन गर्न लिखित सहमति गरेको हो । लिखित सहमतिपछि मात्रै प्रदेशसभा बैठक ६ बजे सञ्चालन गरिएको थियो ।
बागमतीका मुख्यमन्त्री बहादुर सिंह लामा, सत्ता साझेदार नेकपा एमाले संसदीय दलका नेता जगन्नाथ थपलिया, प्रमुख प्रतिपक्षी दल नेकपा माओवादी केन्द्र संसदीय दलका नेता तथा निवर्तमान मुख्यमन्त्री शालिकराम जम्कट्टेल, आर्थिक मामिला तथा योजनामन्त्री कुन्दनराज काफ्ले, राप्रपा संसदीय दलका नेता उद्धव थापालगायतका दलहरुबीच ८ बुँदे सहमति भएको हो ।
नेकपा माओवादी केन्द्रका प्रमुख सचेतक रत्नप्रसाद ढकालले आव २०८२÷०८३ को प्रदेश सभामा पेश भएको विनियोजन विधेयकमाथि देखिएका कमिकमजोरीलाई सच्याएर अगाडी बढ्ने दलहरुबीच सहमति भएको जानकारी दिए ।
लिखित सहमतिमा प्रदेश सभामा पेश भएको विनियोजन विधेयकमा भएका नीतिगत त्रुटिलाई आवश्यक परिमार्जन गरिने उल्लेख छ । अनाधिकृत रुपमा बजेट कार्यक्रममा समावेश आयोजनाहरुको आवश्यक छानविन गरि मात्र कार्यान्वयन गर्ने र १० लाख भन्दा माथिका सबै आयोजनाहरु टेन्डर प्रक्रियाबाट कार्यान्वयन गर्ने सहमतिमा छ ।
बहुवर्षीय आयोजनाहरुमा अपुग भएको बजेट व्यवस्थापन गरी कार्यान्वयन गर्ने र कम रकम भएका क्रमागत आयोजनाहरुमा आवश्यकताको आधारमा रकम थप गरि कार्यान्वयन गर्न सरकार सहमत भएको हो ।
यस्तै, गैरसरकारी, प्रा.लि. र सामाजिक संघसंस्थालाई विनियोजन भएको चालु खर्च मार्फत दिइने अनुदानका कार्यक्रमहरु कार्यान्वयन नगर्ने सरकारसँग सहमति भएको प्रमुख सचेतक ढकालले अनलाइनखबरलाई बताए ।
सहमति पत्रमा नामै किटान भई बजेट तथा कार्यक्रममा प्रस्तुत भएका गैरसरकारी, प्रा.लि. र सामाजिक संघसंस्थाका चालु अनुदानका कार्यक्रमहरु कार्यान्वयन नगर्ने, प्रस्तावित बजेटमा एक विषयगत मन्त्रालयमा समावेश हुनुपर्ने तर अर्को विषयगत मन्त्रालयमा समावेश भएका कार्यक्रमहरु कार्यान्वयन नगर्ने उल्लेख छ ।
प्रदेश सभामा संकल्प प्रस्तावमार्फत बागमती प्रदेश सरकारको नीतिगत सुधारको लागि संकल्प प्रस्ताव पेश गरि कार्यान्वयनमा लैजाने, आगामी आर्थिक वर्षमा बजेट तयार गर्दा प्रदेश सभामा रहेका दलहरुसँग छलफल तथा आवश्यक नीति समेत तय गरेर मात्र बजेट निर्माण गर्ने सहमति सरकार र दलहरुबीच भएको हो ।
सरकार र दलहरुबीच लिखित सहमति भएपछि यसअघि १२ असार र १६ असारमा तय भएर बस्न नसकेको प्रदेशसभा बैठक आज साँझ ६ बजेबाट मात्रै सुरु भएको थियो । प्रदेशसभाका विपक्षी दलहरुले बजेटमा देखिएको त्रुटि सच्याउने लिखित सहमझदारी नभएसम्म बैठक सञ्चलान गर्न नदिने अडान लिएका थिए ।
आज बसेको प्रदेशसभा बैठक साढे ३६ मिनेटमा सकिएको छ । बैठक राप्रपाले बहिष्कार गरेको छ । बहिष्कारका बीच सभामुख पाठकले बैठकलाई अगाडि बढाउँदै आर्थिक मामिला तथा योजनामन्त्री कुन्दनराज काफ्लेलाई मध्यकालिन खर्च संरचना आर्थिक वर्ष २०८२÷८३ देखि २०८४÷८५ सम्म पेश गर्न समय दिए ।
सभामुख पाठकले बैठकमा बोल्ने समय माग गरेकाले प्रमुख प्रतिपक्षी दल नेकपा माओवादी केन्द्र संसदीय दलका नेता शालिकराम जम्कट्टेल र मुख्यमन्त्री बहादुर सिंह लामालाई समय दिए ।
प्रदेशसभा बैठक भोलि शुक्रबार बिहान ११ बजेसम्मका लागि स्थगित भएको छ । भोलिबाट बजेटमाथिको छलफल सुरु हुने जनाइएको छ ।
