। राष्ट्रिय योजना आयोग उपाध्यक्ष प्रा. डा. शिवराज अधिकारी र नेपालका लागि बंलादेशका राजदूत मोहम्मद सापिकुर रहमानबीच भेटवार्ता भएको छ ।
बुधबार सिंहदरबारस्थित आयोगमा भएको भेटमा उनीहरूबीच द्विपक्षीय हितका विषयमा कुराकानी भएको आयोगले जनाएको छ ।
भेटका क्रममा योजना आयोग उपाध्यक्ष अधिकारीले नेपाल र बंगलादेशबीच द्विपक्षीय व्यापारको उच्च सम्भावना रहेको बताए । उनले नेपालका मेडिकल विद्यार्थीले काँकडभिट्टा–फूलबारी–बंगलाबन्ध मार्ग प्रयोग गरिरहेको र त्यसमा सहजीकरण गर्न ध्यानाकर्षण गराए ।
भेटमा सन् २०२६ मा नेपाल र बंगलादेश अतिकम विकसित मुलुकबाट सँगै स्तरोन्नति हुन लागेका सन्दर्भमा त्यसबाट सिर्जित हुने चुनौती र अवसरका विषय र नेपालको हिमालय क्षेत्रदेखि बंगलादेशको सामुद्रिक क्षेत्रसम्म सहज व्यापारिक सम्बन्ध स्थापित गर्ने एवं त्यस क्षेत्रमा पर्यटन प्रवर्द्धन गर्ने विषयमा कुराकानी भएको थियो ।
उनीहरूबीच द्विपक्षीय व्यापार पारवहनका क्षेत्रमा गर्नुपर्ने सुधार एवं नेपालको पूर्वी नाका काँकडभिट्टा–फूलबारी–बंगलाबन्ध व्यापारिक मार्गमा रहेका व्यापारजन्य अवरोधमा सहजीकरण गर्नेबारे समेत छलफल भएको छ । नेपाल र बंगलादेशका पर्यटकीय गन्तव्यबीच सहज आवागमन सहजीकरण तथा घरेलु उद्योग–व्यापार सहजीकरण निर्यात प्रवर्द्धनबारे समेत छलफल भएको आयोगले जनाएको छ ।
भेटमा राजदूत रहमानले नेपाल र बंगलादेशबीच व्यापार तथा पारवहनमा सहजीकरण गर्न आग्रह गरे । उनले द्विपक्षीय हितका निम्ति जनतासँग जनता र व्यापारसँग व्यापार सहकार्य आवश्यक रहेको भन्दै बंगलादेशले नेपालबाट थप परिमाणमा विद्युत् आयातमा इच्छुक रहेको समेत जानकारी दिए ।
