। युक्रेनले मध्य रुसको इजेभ्स्क शहरमा अवस्थित एक कारखानामा ड्रोन हमला गर्दा ३ जनाको मृत्यु भएको छ र ४५ जना घाइते भएका छन्।
उद्मुर्तिया क्षेत्रका गभर्नर अलेक्सान्द्र ब्रेच्लोवले घाइतेमध्ये ६ जनाको अवस्था गम्भीर रहेको जानकारी दिएका छन् ।
उनले हमलाबारे राष्ट्रपति भ्लादिमिर पुटिनलाई जानकारी गराइसकेका छन्। लगत्तै उक्त क्षेत्रमा आपतकालीन अवस्था घोषणा गरिएको छ।
ड्रोनहरूले कुपोल इलेक्ट्रोमेकानिकल प्लान्टलाई निशाना बनाएको बताइएको छ। जमिनबाट हावामा प्रहार गर्ने मिसाइल र रडार स्टेशन उत्पादन गर्ने यो एक सैन्य कारखाना हो।
युक्रेनी सञ्चारमाध्यमका अनुसार, यो कारखाना ओसा हवाई रक्षा प्रणालीको उत्पादनमा पनि विशेषज्ञ मानिन्छ। यसले धेरै प्रकारका ड्रोनहरू पनि विकास गरेको छ।
बीबीसीले एक युक्रेनी अधिकारीलाई उद्धृत गर्दै उल्लेख गरेअनुसार, युक्रेनको सुरक्षा सेवा (एसबीयू) का दुई ड्रोनहरूले करिब १,३०० किलोमिटर टाढा रहेको कुपोल कारखानामा हमला गरेका हुन्।
यो नोभेम्बर २०२४ पछि कुपोल कारखानामाथिको दोस्रो युक्रेनी ड्रोन हमला हो।
अमेरिकाले युक्रेनलाई प्रदान गर्दै आइरहेको सैन्य सहयोग रोक्ने खबर बाहिरिएकै बेला युक्रेनले रूसमाथि हमला गरेको खबर आएको हो ।
