— एएफसी महिला एसिया कप छनोटको समूह ‘जी’ मा नेपाल र आयोजक उज्वेकिस्तानले आ–आफ्नो पहिलो खेलमा अपेक्षित ठूलो अन्तरको जित निकालेको छ ।
मिली स्टेडियममा भएको पहिलो खेलमा नेपालले लाओसलाई ९ गोल गरेको थियो भने उज्वेकिस्तानले श्रीलंकामाथि १० गोल । नेपालका मुख्य प्रशिक्षक प्याट्रिक डे वाइल्ड र कप्तान सावित्रा भण्डारीका लागि यो सुखद सुरुआत रह्यो । दुवै नवनियुक्त हुन् ।
सावित्राभन्दा पनि ‘साम्बा’ नामले बढी चिनिने नेपाली खेलाडीले लाओसविरुद्धको जितपछि आफ्नो गोलसंख्या ६१ पनि पुर्याएकी छन्, त्यसमा सम्भव ४ गोलसँगै । लाओसविरुद्धको ८८ औं मिनेटमा सम्भव नवौं गोल भने उनको नाममा राखिएको छैन, त्यसलाई लाओसकी डिफेन्डर सायसमोनी इन्थापोफोनलाई श्रेय दिएर आत्मघाती मानिएको छ ।
डे वाइल्डले सोमबार कान्तिपुरसँगको कुराकानीमा भने, ‘यो हाम्रा लागि छनोटमा राम्रो सुरुआत पक्कै पनि हो । तर अझै पनि हाम्रो ध्यान आफ्नो ठ्याक्कै अगाडिको खेलमै हुनुपर्छ ।’ उनको स्पष्ट आशय थियो, नेपालले अहिले नै उज्वेकिस्तानविरुद्धको खेलबारे सोचिरहेको छैन, बरू टिमको ध्यान पूर्णतः श्रीलंकाविरुद्धको खेलमा छ ।
लगभग यस्तै सोच उज्वेकिस्तानकी प्रशिक्षक कोट्रान कुलबाटइको पनि छ । उनले श्रीलंकामाथि प्राप्त एकोहोरो जितपछि भनिन्, ‘पहिलो खेलको नतिजा धेरै अर्थमा राम्रो रह्यो । यति ठूलो जितका बावजुत मैले टिममा सुधारको ठाउँ देखेको छु । त्यसैले हामीले आफ्नो पूरा ध्यान लाओसविरुद्धको खेलमा केन्द्रित गरिसकेका छौं ।’
बुधबार नेपालले श्रीलंकाको सामना गर्नेछ भने उज्वेकिस्तान लाओसविरुद्ध भिड्ने छ । दुवै प्रशिक्षकले जस्तै दाबी गरे पनि एउटा तथ्य निश्चित छ, समूह विजेताको निर्णय अन्तिम खेलबाटै हुनेछ । त्यो भनेको नेपाल र उज्वेकिस्तानको खेल नै हो । समूह विजेता अर्को वर्ष अस्ट्रेलियामा हुने एसिया कपका लागि छनोट हुनेछ ।
यो खेल भने शनिबार हुनेछ । त्यस अगाडि अपेक्षा गरेको छ, नेपाल र उज्वेकिस्नानले पनि आ–आफ्नो दोस्रो खेल सजिलै जित्नेछन् । नेपालले सन् २०१० मा पहिलो पटक श्रीलंकाको सामना गरेको थियो । त्यसमा नेपालको जित अन्तर थियो, ८–१ । त्यसयता नेपाल र श्रीलंकाले एक आपसमा नौपल्ट खेलेका छन् । ती सबैमा विजयी हुने टिम नेपाल नै रहेको छ ।
यी खेलमा पछिल्ला दुई प्रतिस्पर्धामा नेपालले श्रीलंकालाई समान ६–० ले हराएको थियो । अहिलेसम्म सबैभन्दा साँघुरो जित भने १–० को छ । यदि सबैको अपेक्षा अनुसार नै नेपाल र उज्वेकिस्तानबीचको खेल निर्णायक हुनेछ । यो खेल बराबरीमा टुंगिने हो भने समूहको शीर्षमा रहने टिमको निर्णय गोल अन्तरबाट हुनेछ ।
यसमा पनि बराबरी हुने हो भने समूह चरणमा कुन टिमले बढी गोल गरेको हुनेछ, त्यही समूह विजेता हुनेछ । त्यसपछि पनि केही टुंगो लागेन भने लागू हुनेछ, फेयर प्लेमा कुन टिम अगाडि छ भनेर । त्यसमा पनि बराबरी हुने हो भने समूह विजेताको निर्णय टसबाट हुनेछ । तर, प्रशिक्षक डे वाइल्ड भन्छन्, ‘मैले त्यहाँसम्म सोचेकै छैन । जतिबेला उपयुक्त समय आउनेछ, त्यही बेला निर्णय गर्नेछौं ।’
