— युद्धग्रस्त प्यालेस्टिनी क्षेत्रमा युद्धविरामका लागि नयाँ पहल भइरहँदा इजरायली सेनाले सोमबार समुद्री किनारको विश्राम क्षेत्रमा २४ जनासहित कम्तीमा ५१ जनाको हत्या गरेको गाजाको नागरिक सुरक्षा एजेन्सीले जनाएको छ ।
इरानसँगको १२ दिने युद्धले विराम लिएपछि इजरायलको गाजासँगको लडाइँ पनि रोकिने सम्भावना बढेको हो । इजरायल–गाजाबीचको २० महिनाभन्दा लामो लडाइँका कारण गाजामा खाद्यान्न, आवास र पिउने पानीको अभाव हुँदा २० लाखभन्दा बढी जनसंख्या गम्भीर मानवीय अवस्थाबाट जुधिरहेका छन् । हमलामा मारिनेहरूमध्ये फोटो पत्रकार इस्माइल अबु हाताब पनि रहेको हमास सरकारको मिडिया कार्यालयले जनाएको छ ।
नागरिक रक्षा प्रवक्ता महमुद बासलले मध्य र दक्षिणमा ११ वटा सहायता केन्द्रहरूसहित गाजाभरि इजरायली आक्रमणमा २७ जनाको मृत्यु भएको बताए । मे महिनाको अन्त्यमा इजरायलले सहायता दिन थालेपछि हालैका साताहरूमा वितरण केन्द्रहरू नजिकै प्यालेस्टिनीहरूको बारम्बार हत्या भएको प्रत्यक्षदर्शी र स्थानीय अधिकारीले रिपोर्ट गरेका छन् । दक्षिणी सहर खान युनिसमा सहायता खोज्नेहरूले रफाहमा इजरायली सेनाले गोली हानेको बताएपछि मृतक र घाइतेहरूलाई ‘ओपन–टप ट्रेलर’मा अस्पताल लगिएको थियो ।
नासेर अस्पतालमा एएफपीको भिडियो फुटेजमा घाइतेहरूलाई रगत लागेको भुइँमा उपचार भइरहेको देखाइएको छ । नागरिक सुरक्षा रिपोर्टका बारेमा इजरायली सेनाले भने तत्काल कुनै टिप्पणी गरेको छैन ।
यसैबीच, इजरायली प्रधानमन्त्री बेन्जामिन नेतान्याहुले जुलाई ७ मा ह्वाइट हाउसको भ्रमण गर्न लागेको एक अमेरिकी अधिकारीले नाम नछाप्ने सर्तमा बताएका छन् । अमेरिकी राष्ट्रपति डोनाल्ड ट्रम्पले हालै इजरायललाई ‘गाजामा पनि सम्झौता गर्न’ आग्रह गरिरहेका बेला प्रधानमन्त्री नेतान्याहुको अमेरिका भ्रमणलाई चासोका साथ हेरिएको छ । त्यसैगरी इजरायली रणनीतिक मामिलामन्त्री रोन डर्मर पनि यसै साता अमेरिकी अधिकारीहरूसँग वार्ताका लागि वासिङ्टन जाँदै छन् । ह्वाइट हाउसको आग्रहपछि गाजासँग युद्धविराम गर्ने सम्भावना बढिरहे पनि इजरायलले प्यालेस्टिनी क्षेत्रमा आफ्नो आक्रमणलाई भने जारी राखिरहेको छ । जबकि गत शुक्रबार ट्रम्पले गाजामा ‘अर्को साताभित्र’ नयाँ युद्धविरामको आशा गरिरहेको बताएका थिए ।
