— अमेरिकी राष्ट्रपति ट्रम्पले गाजामा ६० दिनको युद्धविरामलाई अन्तिम रुप दिनका लागि इजरायलले आवश्यक सर्तमा सहमति दिएको बताएका छन् ।
ट्रम्पले ट्रुथ सोसियलमा एक पोस्टमा लेखेका छन्, ‘हामी युद्ध अन्त्यका लागि सबै पक्षसँग मिलेर काम गर्नेछौं ।’ यद्यपि उनले सर्तबारे कुनै जानकारी भने दिएका छैनन् ।
उनले लेखेका छन्, ‘कतार र मिश्रले शान्ति स्थापनाका लागि धेरै मेहनत गरेका छन् । र अन्तिम प्रस्ताव पेस गर्नेछन् । मलाई विश्वास छ हमास यो सम्झौतालाई स्वीकार गर्नेछ । किनकी यसभन्दा राम्रो अर्को कुनै स्थिति हुनेछैन । बरु अर्को विकल्प खराब हुनेछ ।’
सात अक्टुबर २०२३ मा हमासले इजरायलमा आक्रमण गरेको थियो । उक्त आक्रमणमा करिब १२ सय जना मारिएका थिए । जसमा १० जना नेपाली विद्यार्थी पनि थिए । नेपालका विपिन जोशीको अवस्था अझै अज्ञात छ । हमासको उक्त आक्रमणपछि इजरायलले गाजामा हमासविरुद्ध सैन्य कारबाही सुरु गरेको थियो ।
हमासको स्वास्थ्य मन्त्रालयका अनुसार अहिलेसम्म गाजामा ५६ हजार ६४७ जनाको मृत्यु भएको छ । हमासले ट्रम्पले भनेका सर्तहरु स्वीकार गर्छ या गर्दैन भन्ने अहिलेसम्म स्पष्ट भइसकेको छैन ।
ट्रम्पको यो घोषणा आगामी साता इजरायलका प्रधानमन्त्री बेन्जामिन नेतान्याहुसँग हुन गइरहेको बैठकअघि आएको हो । जसलाई लिएर ट्रम्पले आफू निकै दृढ रहेको बताएका छन् ।
मंगलबार उनले नेतान्याहु पनि शत्रुता समाप्त गर्न चाहिरहेको विश्वास व्यक्त गरेका थिए । ट्रम्पले भने, ‘मलाई लाग्छ, हामी आगामी सातासम्म सम्झौता गर्नेछौं ।’
गत साता हमासका एक वरिष्ठ अधिकारीले अन्तर्राष्ट्रिय सञ्चारमाध्यम बीबीसीसँग कुरा गर्दै मध्यस्थकर्ताले गाजामा नयाँ युद्धविराम र बन्धकको रिहाईका लागि प्रयास गरिरहेको बताएका थिए । तर इजरायलसँग वार्ता भने अहिले हुन सकेको छैन ।
इजरायलले हमासलाई पूर्ण रुपमा अन्त्य गरेपछि मात्र कारबाही रोकिने बताएको छ । हमास लामो समयदेखि स्थायी युद्धविराम र गाजाबाट इजरायली सेनाको पूरै तरिकाले फिर्ता हुनुपर्ने माग राख्दै आएको छ । करिब ५० जना इजरायली नागरिक अझै हमासको कब्जामा रहेका छन् । जसमध्ये २० जना जिवित हुनसक्ने बताइएको छ ।
