— गृहमन्त्री रमेश लेखकले विपद्जन्य क्षति हुन नदिन र विपद्पछि नागरिक तथा सम्पत्तिको सुरक्षा गर्न सरकारले तयारी अवस्थामा रहेको बताएका छन्।
मंगलबार सिंहदरबारमा विपद् प्रतिकार्यमा हवाई उद्धारका लागि निजी हेलिकप्टर प्रयोग सम्बन्धमा वायुसेवा सञ्चालक सङ्घ र विपद् जोखिम न्यूनीकरण तथा व्यवस्थापन प्राधिकरणबीच भएको सम्झौता पश्चात् गृहमन्त्री लेखकले यस्तो बताएका हुन् ।
उनले नेपालमा विपद्को जोखिम उच्च रहेको र हाल मनसुनको प्रारम्भिक चरणमा रहेको उल्लेख गरे। मनसुनजन्य विपद्बाट ठूलो जनधनको क्षति हुने गरेको भन्दै गृहमन्त्री लेखकले विगतका अनुभवलाई आधार मानेर नागरिक र सम्पत्तिको सुरक्षाका लागि पूर्वतयारी आवश्यक रहेको धारणा व्यक्त गरे।
गृहमन्त्री लेखकले भने, 'हामी कहाँ विपद्को जोखिम उच्च रहन्छ। अहिले हामी मनसुनको प्रारम्भिक चरणमा छौँ। मनसुनजन्य विपद्ले धेरै ठूलो जनधनको क्षति हुने गरेको छ। हाम्रो विगतका अनुभवले देखाएको छ— यस्तो अवस्थाबाट नागरिक र सम्पत्तिको सुरक्षा गर्न हामी तयारी अवस्थामा बस्नुपर्छ। आज जुन सम्झौता (एमओयू) गरिएको छ, यो अत्यन्तै महत्त्वपूर्ण काम हो। काठमाडौँ उपत्यकाभित्र जुनसुकै ठाउँमा जोखिम उत्पन्न भएमा वायुसेवा सञ्चालक संघले हेलिकप्टरबाट निःशुल्क उद्धार गर्ने कुरा भएको छ। तपाईँहरूले ठूलो सार्वजनिक दायित्व निर्वाह गर्नुभएको छ।'
सरकार र वायुसेवा सञ्चालक संघबीच काठमाडौँ उपत्यकामा विपद्जन्य जोखिम उत्पन्न भए निःशुल्क उद्धार सेवा प्रदान गर्ने सम्झौता भएको हो। उपत्यका बाहिर भने आवश्यक परेमा अपरेशनल कस्ट (सञ्चालन खर्च) लिएर उद्धार सेवा दिने समझदारी भएको छ।
खोज, उद्धार तथा उद्धारपश्चात् व्यवस्थापनमा नेपाली सेना, नेपाल प्रहरी, सशस्त्र प्रहरी बल नेपाल लगायतका सुरक्षा निकायलाई गृह मन्त्रालयमार्फत परिचालन गरिने बताइएको छ।
