: युवा तथा खेलकुद मन्त्रालयले प्रदान गर्ने राष्ट्रिय खेलकुद सम्मान २०८१ तथा खेलकुद पत्रकारिता पुरस्कार वितरण गरिएको छ। युवा तथा खेलकुद मन्त्रालयमा आयोजित एक कार्यक्रममा खेलाडी, प्रशिक्षक तथा पत्रकारहरूलाई सम्मान गरिएको हो।
राष्ट्रिय खेलकुद सम्मानबाट खेलाडी, प्रशिक्षक, निर्णायक र चिकित्सक ९ जनालाई जनही १ लाख रुपैयाँसहित सम्मानपत्र प्रदान गरियो।
सम्मानित हुनेमा खेलाडीमा मानमती विष्ट (कबड्डी), प्रेम बहादुर लिम्बु (तेक्वान्दो), वीर बहादुर महरा (तेक्वान्दो), अनुजा कुलुङ राई (कबड्डी), दिपा शाही (फुटबल), भरत सिंह महता (पारा तेक्वान्दो) रहेका छन्। प्रशिक्षकमा पारा तेक्वान्दोका कविराज नेगी लामा सम्मानित भए। खेल चिकित्सक तर्फ राजु डंगोल महर्जन र धनकुमार मैनालीले खेल निर्णायकको रुपमा सम्मान ग्रहण गरे।
त्यस्तै खेलकुद पत्रकारिताको क्षेत्रमा उल्लेखनीय योगदान गर्ने पत्रकारमा नयाँ पत्रिकामा कार्यरत श्रीलोचन राजोपाध्याय लाई खेलकुद पत्रकारिता सम्मान प्रदान गरियो। खेलकुद पत्रकार प्रोत्साहन पुरस्कार अन्तर्गत विभिन्न प्रदेशका ९ जना पत्रकारलाई सम्मान गरिएको हो।
सम्मानित पत्रकारहरूमा मुकुन्द घिमिरे (कोशी), शरद चन्द्र भट्टराई (मधेश), विक्रम कुमार बानियाँ (बागमती), दिनानाथ बराल (गण्डकी), स्वस्तिक श्रेष्ठ (लुम्बिनी), दिनेश कुमार बुढा (कर्णाली), दिनेश बहादुर विष्ट (सुदूरपश्चिम), नमिता दाहाल (समावेशी महिला) र रुपा गहतराज (समावेशी) रहेका छन्।
यो कार्यक्रम अघि युवा तथा खेलकुद मन्त्रालयले राष्ट्रिय खेलकुद नीति २०८२ पनि सार्वजनिक गरेको थियो।
