: बर्दियाको बढैयाताल गाउँपालिका—६ उच्चागाउँस्थित मैनापोखरबाट बाँसगढी आवागमन गर्ने भित्री सडक खण्डबाट केही दिनअघि चिरान गरेको साल जातको चौकोस काठहरू प्रहरीले नियन्त्रणमा लियो। भे १ त ६०८२ नम्बरको ट्याक्टरमा लोड गरी राखिएको अवस्थामा अवैध काठ रीतपूर्वक बरामद गरी आवश्यक कारबाहीका लागि वन डिभिजन कार्यालय बाँसगढीमा बुझाइएको छ।
ट्याक्टरको ट्रलीमा लोड गरिएको १ सय २९.५७ क्युफिट साल जातको चिरान काठ र सोही प्रजातिको ५ क्विन्टल स्ट्रिप नियन्त्रणमा लिइएको जिल्ला प्रहरी कार्यालय बर्दियाका प्रहरी नायब उपरीक्षक चक्रबहादुर डमरपालले बताए। उनले भने, ‘नियन्त्रणमा लिएको काठसहितको ट्रली ट्याक्टरको मूल्य अन्दाजी १३ लाख ६ सय ६५ रुपैयाँ छ। पछिल्लो समय बर्दियामा चिरानी अवस्थाको अवैध काठको कारोबार बढेको छ।
प्रहरीले जेठमा पनि चिरानी गरेको अवस्थामा साल जातको काठ नियन्त्रणमा लिएको थियो। गुलरिया नगरपालिका ३ मनकामना टोलस्थित राजेन्द्र गोडियाको गोठ नजिकैबाट बेवारिसे अवस्थामा अवैध काठ बरामद गरिएको डीएसपी डमरपालले जानकारी दिए। उनले थपे, ‘वन कार्यालयले टाँचा नलगाएको चिरान काठ हामीले फेला पार्यौं।’
नियन्त्रणमा लिएको ८१.१५ क्युफिट चिरान काठ आवश्यक अनुसन्धानका लागि डिभिजन वन कार्यालय बर्दियामा बुझाएका छौं। काठको बजार मूल्य अन्दाजी ३ लाख ६५ हजार १ सय ७५ रुपैयाँ छ। रीतपूर्वक नियन्त्रणमा लिई वन कार्यालयमा बुझाइएको काठको अनुसन्धान भइरहेको उनले जानकारी दिए। डिभिजन वन कार्यालय बर्दियाले वन व्यवस्थापनअन्तर्गत पहिचान गरिएका रूखहरू काटिरहेको छ। जसका कारण पनि जिल्लामा आपूर्तिका काठहरू सर्वसुलभ रूपमै वितरण हुँदै आइरहेको डिभिजन वन कार्यालय बर्दियाका वरिष्ठ वन अधिकृत विजयराज सुवेदीले बताए।
‘केही दिनअघि बाँसगढीमा समातिएको काठ सामुदायिक वनबाट उपभोक्ता पाएकाले अनुसन्धानपश्चात् छाडेका छौं’, उनले भने। जेठमा पक्राउ भएको काठ अनुसन्धानकै क्रममा वन कार्यालय परिसरमा रहेको उनले प्रस्ट्याए। ‘काठ कसको हो पत्ता लागेको छैन। मेरो काठ हो भनेर पनि कोही आएको छैन’, उनले थपे, ‘वनबाट प्रशस्त काठ आपूर्तिमार्फत नागरिकलाई वितरण गरे पनि यदाकदा अवैध काठ भेटिनु दुःखद् हो।’ राष्ट्रिय वन क्षेत्रबाट काठ नचोरिएको उनको दाबी छ।
