: सभामुख देवराज घिमिरेले दृष्टिकोण र प्राथमिकता फरक-फरक भएपनि साझा राष्ट्रिय सरोकारका विषयमा दलीय सहमति आवश्यक रहेको बताएका छन्। संसद दिवस, २०८२ को अवसरमा शुभकामना गर्दै उनले संसद् वाद विवादको नभई संवादको थलो बन्नुपर्ने बताएका हुन्।
उनले लोकतान्त्रिक शासन प्रणालीको आधारभूत मर्म नै संवाद, सहकार्य र सहमति हो। ‘लोकतान्त्रिक शासन प्रणालीको आधारभूत मर्म नै संवाद, सहकार्य र सहमति हो। संसद जनताको प्रतिनिधिमूलक संस्था भएकाले यसका कार्यहरू राष्ट्र र जनहितमा केन्द्रित र दीर्घकालीन प्रभाव पार्ने हुन आवश्यक छ।’ घिमिरेले भने, ‘विविध राजनीतिक दलहरूबीच विचार, दृष्टिकोण र प्राथमिकताहरू फरक-फरक भए तापनि साझा राष्ट्रिय सरोकारका विषयमा दलीय सहमति आवश्यक र अपरिहार्य छ। संसद् वादविवादको होइन, संवादको थलो बन्नुपर्दछ।’
उनले नीति निर्माण, कानून निर्माण तथा कार्यान्वयनको प्रभावकारी निगरानी संसदमार्फत गरिने बताए। ‘संसद जनताको सार्वभौमसत्ताको प्रयोग गर्ने एक प्रमुख संस्था हो। शासन व्यवस्थामा नीति निर्माण, कानुन निर्माण तथा कार्यान्वयनको प्रभावकारी निगरानी जस्ता महत्त्वपूर्ण कार्य संसदमार्फत सम्पन्न गरिन्छ। संसदले व्यवस्थापकीय कार्यविधिको माध्यमबाट जनताको अभिमतअनुरूप नीति र कानून सुनिश्चित गर्दछ। जनताको स्वीकृति बिना कर नलगाइनेू भन्ने लोकतान्त्रिक सिद्धान्तको सम्मान गर्दै संविधानले करसम्बन्धी सबै प्रस्तावहरू सभामा प्रस्तुत गर्नुपर्ने व्यवस्था गरेको छ’ उनले भने।
सभामुख घिमिरेले दलहरूलाई संवाद र सहकार्यको माध्यमबाट दलीय सहमति कायम गर्दै संसदको गरिमा उच्च राख्न र जनअपेक्षाको सम्बोधनमा एक भएर अगाडि बढ्न हार्दिक आह्वान गरे। उनले भने, ‘संसदलाई अझ प्रभावकारी, उत्तरदायी र जनउत्तरदायी बनाउनेतर्फ संसदमा प्रतिनिधित्व गर्ने राजनीतिक दल तथा सांसदहरू, कर्मचारी वर्ग, स्वतन्त्र प्रेस, नागरिक समाज र सचेत नागरिकहरूको योगदानप्रति आभार प्रकट गर्दै पुनस् शुभकामना व्यक्त गर्दछु।’
नेपालमा पहिलो निर्वाचित प्रतिनिधि सभाको बैठक बसेको स्मरणमा प्रत्येक वर्ष असार १६ गते संसद दिवस मनाइन्छ। आजको दिन लोकतन्त्र, संविधानवाद, जनताको अधिकार तथा जनताप्रति जनप्रतिनिधिको उत्तरदायित्वको स्मरण गर्ने दिवस पनि हो।
