: त्रिभुवन राजपथ अन्तर्गत पर्ने वीरगन्जको मुख्य सडक विस्तारको काम सोमबारदेखि सुरु भएको छ।
मुख्य सडक विस्तारको विरुद्ध स्थानीय घरधनीहरूले दायर भएको मुद्दा सर्वोच्च अदालतले गत फागुन २८ गते खारेज गरेसँगै सडक विभाग र जिल्ला प्रशासन कार्यालय पर्साको आग्रहमा वीरगन्ज महानगरपालिकाले सोमबारदेखि सडक क्षेत्रभित्र (२५/२५ मिटर) पर्ने संरचनाहरू हटाउन सुरु गरेको हो।
सोमबार बिहान महानगरका मेयर राजेशमान सिंह स्वयं तीनवटा डोजरसहितको टोली लिएर वीरगन्ज भन्सार क्षेत्रमा पुगेका थिए। त्यसक्रममा डोजर लगाएर सडक क्षेत्रभित्र परेका संरचनाहरू भत्काइएको थियो। सोमबारदेखि सुरु सडक विस्तार कार्य भन्सारदेखि गण्डक चोकसम्म निरन्तर अघि बढाइने मेयर सिंहले बताए।
गत असोज २८ गते सर्वोच्च अदालतले सडक विस्तार विरुद्ध दायर गरेको मुद्दाको रिट खारेज गर्दै सरकारको पक्षमा फैसला गरेपछि झण्डै १२ वर्षदेखि अन्योलमा परेको वीरगन्जको मेनरोड विस्तारका लागि बाटो खुलेको थियो।
त्रिभुवन राजपथ अन्तर्गत पर्ने वीरगन्जको गण्डक चोकदेखि पावर हाउस, घण्टाघर, आदर्शनगर, रजतजयन्ती चोक, शंकराचार्यद्वार हुँदै मितेरीपुल सम्मको मेनरोड २५/२५ मिटर विस्तार गर्ने सडक विभागको निर्णय खारेजीको माग गर्दै त्यस क्षेत्रमा पर्ने करिब १ हजार २ सय घरधनीले सर्वोच्च अदालतमा २०७६ कार्तिक ७ गते रिट हालेका थिए।
तर सर्वोच्चले उक्त मुद्दाको पटक पटक पेसी सारेर टुंगो नलगाइ दिएका कारण १२ वर्षदेखि वीरगन्जको सडक विस्तारको काम सुरु नहुँदै रोकिएको थियो।
