: फुकुशिमा आणविक प्लान्टबाट प्रशोधित फोहोर पानी निस्कने चिन्ताका कारण दुई वर्षअघि जापानका अधिकांश क्षेत्रबाट समुद्री खाना आयातमा लगाइएको प्रतिबन्ध चीनले हटाएको छ।
बेइजिङले जापानबाट सर्तसहित आयात पुनः सुरु गर्ने बताएको छ। तर यो टोकियो र फुकुशिमासहित जापानका ४७ प्रिफेक्चरमध्ये १० मा लागू हुने छैन।
चीनको सामान्य भन्सार प्रशासनले आइतबार फुकुशिमाको दूषित पानीको दीर्घकालीन अनुगमनको क्रममा लिइएका नमुनाहरूमा कुनै अनियमितता नभेटिएको जनाएको छ।
२०११ मा आएको सुनामीले उत्तर–पूर्वी जापानमा अवस्थित फुकुशिमा प्लान्टका तीन रिएक्टर डुबाएको थियो। यो चेर्नोबिल पछि विश्वको सबैभन्दा ठुलो आणविक दुर्घटना मानिन्छ।
२०११ को सुनामीमा फुकुशिमा प्लान्टका ६ वटा आणविक रिएक्टरमध्ये तीनवटा नराम्ररी क्षतिग्रस्त भएका थिए। वर्षौंको अवधिमा त्यहाँ १० लाख टनभन्दा बढी प्रशोधित फोहोर पानी जम्मा भएको छ।
२०२३ मा जापानले यो प्रशोधित दूषित पानी समुद्रमा छोड्न थालेको हो।
