— अमेरिकाको कोलोराडो राज्यबाट आइतबार १ सय १४ जना गैरआप्रवासी एकै पटक पक्राउ परेका छन् ।
स्थानीय समयअनुसार आइतबार बिहान कोलोराडोको मुख्य सहर डेनभरबाट करिब ७० माइल दक्षिणमा पर्ने कोलोरोडो स्प्रिङ्सको एक भूमिगत नाइट क्लबमा छापा मार्ने क्रममा ड्रग इन्फोर्समेन्ट एडमिनिस्ट्रेशन (डिईए)को टोलीले एकै पटक १ सय १४ जना कागजातविहिनलाई पक्राउ गरेको हो ।
अमेरिकी संचारमाध्यम युएसए टुडेका अनुसार (डिईए)को रकी माउन्टेन डिभिजनले अप्रिल २७ मा कोलोराडो स्प्रिङ्सको भूमिगत नाइटक्लबबाट १ सय १४ जनालाई हिरासतमा लिएको र निष्कासनका लागि प्रक्रिया अघि बढाएको छ ।
‘भूमिगत नाइट क्लब अवैध नाइट क्लब हो, भित्र जे भइरहेको थियो त्यो लागूपदार्थको तस्करी, वेश्यावृत्ति र हिंसाका अपराधहरु भइरहेको थियो । हामीले त्यहाँ थुप्रै बन्दुकहरुसमेत जफत गर्यौं,’ डीईए रकी माउन्टेन डिभिजनका विशेष एजेन्ट इन्चार्ज जोनाथन पुलेनले पत्रकार सम्मेलनमा भने ।
युएस इमिग्रेशन एण्ड कस्टम इन्फोर्समेन्ट (आईस)का अधिकारीहरुले फ्लोरिडामा बहुएजेन्सी आप्रवासन प्रवर्तन कारबाही अपरेशन टाइडल वेभको पहिलो केही दिनमा लगभग आठ सय व्यक्तिहरुलाई पक्राउ गरिएको घोषणा गरेको एक दिनपछि डेनभर स्प्रिङ्समा छापा मारेको हो ।
पुलेनका अनुसार नाइट क्लबबाट कोकिन र पिंक कोकिन, ‘टुसी’ भनिने पदार्थको मिश्रणसहित दर्जनौं लागुऔषधका स–साना प्याकेटसमेत बरामद गरिएको थियो ।
क्लबभित्र २ सय भन्दा बढी व्यक्तिहरु भएको र जसमध्ये १ सय १४ जना गैरकानुनी रुपमा अमेरिकामा बसोबास गर्दै आएको पुलेनले बताए । प्रहरीको टोलीले अमेरिकी सेनाका एक दर्जनभन्दा बढी सक्रिय सदस्यहरुलाई पनि नाइट क्लबबाटै हिरासतमा लिएको युएसए टुडेलले जनाएको छ ।
अमेरिकी अध्यागमन र भन्सार प्रवर्तनले गैरकानुनी रुपमा रहेका आप्रवासीलाई नियन्त्रणमा राखेको र पक्राउ परेका सेनाका सक्रिय कर्मचारीमाथि सेनाको अपराध अनुसन्धान महाशाखाले अनुसन्धान गर्ने उनले पुलेनले बताए ।
गत जनवरी २० मा पदभार ग्रहण गरेदेखि नै राष्ट्रपति डोनाल्ड ट्रम्पले संघीय न्यायाधीसका साथै राज्य र स्थानीय अधिकारीहरुसँग विवाद गर्दै गैआप्रवसीलाई निष्कासन अभियान चलाइरहेका छन् । ट्रम्पले सामूहिक निष्कासनको लागि दबाब दिइरहेका बेला संघीय अधिकारीहरुले अमेरिकाभर छापालाई तीव्रता दिइरहेका छन् ।
