: धरानवासीलाई निःशुल्क खानेपानी खुवाउने प्रतिबद्धता जनाएका धरान उपमहानगरपालिकाका मेयर हर्क साम्पाङले एक घरमा जडान गरिएको खानेपानीको धारा काटिदिएका छन्। सूचनाविनै धरान-१५ का इन्द्रबहादुर तामाङको घरमा जडान गरिएको खानेपानीको धारा काटिएको हो।
हर्क साम्पाङ मेयर हुनुभन्दा अघि खानेपानी प्राप्तिको आन्दोलन र २०७९ को स्थानीय निर्वाचनमा हर्कलाई जिताउन मुख्य भूमिका खेलेका तामाङको घरमा जडान गरिएको खानेपानीको धारा काटिएको हो।
हर्क साम्पाङलाई आफूलाई धरानको मेयरमा जिताए धरानवासीलाई निःशुल्क खानेपानी वितरण गर्ने घोषणा गरेका थिए। मेयर साम्पाङको निःशुल्क खानेपानी वितरण गर्ने आसमा पानीको महसुल नतिरि बसेका तामाङको घरको खानेपानीको धारा काट्न सोमबार नगर प्रहरी परिचालन गरिएको हो।
चुनावअघि साम्पाङले गरेको चुनावी घोषणापत्र अनुसार आफ्नो घरमा जडान गरेको पानीको महसुल मिनाहा गर्न माग गर्दै धरान नगरपालिका गएका थिए। त्यहाँ मेयर साम्पाङले तामाङलाई नगर प्रहरी लगाएर दुर्व्यवहार समेत गरेका थिए।
मेयरको कार्यकक्षमा साम्पाङ र तामाङबीच भनाभन समेत भएको थियो। त्यसैलाई पूर्वाग्रह राखेर मेयर साम्पाङले खानेपानीको अभाव भइरहेको अवस्थामा खानेपानीको धारा काटेर पानी पिउनबाट वञ्चित गराएको तामाङले आरोप लगाएका छन्।
धरानका मेयर हर्क साम्पाङको निर्देशनमा तामाङको घरमा गएर खानेपानीको धारा काटिदिएको धरान नगर प्रहरीका प्रमुख मेघराज भण्डारीले बताए। उनले मेयर सापको निर्देशनमा नगर प्रहरी परिचालन गरी खानेपानीको जडान गरिएको धारा बन्द गरिएको बताए।
तामाङले धेरै समय सम्म खानेपानीको महसुल नतिरेको कारण मेयर साम्पाङले धारा काटिदिन निर्देशन दिएको भण्डारीले बताए।
इन्द्रबहादुर तामाङ र धरान-१ का बिहानसिंह श्रेष्ठ गत शुक्रबार साम्पाङको कार्यकक्षमा गएर उनी अभियन्ता हुँदा उनले गरेको ‘आह्वान’ अनुसार खानेपानीको महसुल नबुझाई बसेको जानकारी गराएका थिए।
सम्पाङले आफूलाई मेयरमा जिताए धरानवासीलाई खानेपानी निःशुल्क खुवाउने प्रतिबद्धता जनाएका थिए। तामाङले साम्पाङले खानेपानी निःशुल्क खुवाउने भनेपछि आफूले साम्पाङलाई चुनाव जिताउन रातदिन खटेको बताए। साम्पाङ नगर प्रमुख भएपछि समेत ज्ञापनपत्र बुझाउँदै खानेपानीको महसुल मिनाहा गर्न अनुरोध गर्दा हुन्छ भनेको तामाङले बताए।
हाल तामाङको खानेपानीको महसुल रकम ४३ हजार र बिहानसिंहको ३९ हजार बक्यौता रहेको छ। तामाङको घरमा खानेपानीको धारा काटिएको विषयमा बुझ्न पटक-पटक फोन गर्दा साम्पाङले फोन उठाएनन्।
