— जिल्ला सदरमुकाम रुकुमकोटमा ठूला सभा–समारोह र मेला महोत्सव गर्ने स्थान नहुदाँ व्यवस्थापनमा समस्या देखिने गरेको छ ।
सिस्ने गाउँपालिका वडा नं. ५ र ६ मा अवस्थित रुकुमकोट भौगोलिक हिसाबले सुन्दर र फराकिलो भए पनि विभिन्न कार्यक्रम गर्न सार्वजनिक स्थानको भने अभाव हुने गरेको हो ।
ठाउँ नभएपछि हरेक वर्ष आयोजना गरिने ‘पूर्वी रुकुम साँस्कृतिक महोत्सव’ यसपल्ट निजी जग्गा भाडा लिएर सञ्चालन गरिरहेको महोत्सवका संयोजक लखन स्वारले बताए ।
‘गत वर्षसम्म ५ नंम्बर वडामा अवस्थित रुक्मिणी माध्यमिक विद्यालयको मैदानमा महोत्सव हुन्थ्यो । यसवर्ष विद्यालयले त्यहाँ कार्यक्रम गर्न नदिएपछि बाहिर गर्नुपर्यो । छिप्रिदह छेउको गहुँबारी भाडामा लिएर कार्यक्रम गरिरहेका छौं,’ उनले भने, ‘चार जनाको जग्गामा प्रतिव्यक्ति ५ देखी १० हजारसम्म तिरेर १५ दिनका लागि कूल ५० हजार रुपैयाँमा भाडामा लिएर कार्यक्रम गर्नुपरेको छ ।’
अघिल्ला वर्षसम्म महोत्सव गर्न दिएको विद्यालयले यस वर्षदेखि भने पठनपाठनमा असर पर्ने भएकाले अनुमति नदिएको रुक्मिणी मावि शिक्षक–अभिभावक संघका अध्यक्ष फणिन्द्र आचार्यले बताए ।
रुकुमकोटमा कार्यक्रम तथा खेलकुद गतिविधि सञ्चालन गर्न विद्यालयको यही मैदानबाहेक अरु ठाउँ नभएको भन्दै सिस्ने गाउँपालिका उपाध्यक्ष गोपाल रेउलेले यो समस्या समाधानका लागि कोशिस भने गरिरहेको बताए ।
‘वडा नं. ६ स्थित ढकलबारामा ३१ सय वर्गमिटर जग्गा खरिद गरिरहेका छौं । अहिलेसम्म यसमध्ये आधा सरकारी नाममा भए पनि बाँकी जग्गा सरकारीकरण गर्न सकिएको छैन,’ रेउले भन्छन्, ‘त्यस्तै रुकुमकोटमै बसपार्कका लागि भनेर खरिद गरिएको ४५ सय वर्गमिटर जग्ग्गा त छ तर त्यो पनि सरकारीकरण गर्न नसक्दा समितिको नाममा छ ।’
निजी जग्गालाई सरकारले खरिद गर्ने कानुनी व्यवस्था नभएको र अरु उपाय लगाएर सरकारको नाममा पास गर्न खोज्दा पनि कानुनी र प्रक्रियागत झन्झट रहेको बताए । रुकुमकोट र आसपासमा सार्वजनिक स्थानहरु भए पनि ती कोही पायक पर्ने ठाउँमा छैनन् । भएका केही चाहिँ पर्याप्त नभएका कारण यस्ता मेला–महोत्सव गर्न ठाउँ अभाव छ ।
