। आगामी वर्ष जेठमा कर्णाली प्रदेशमा तय भएको दशौँ राष्ट्रिय खेलकुद नहुने भएको छ । दोस्रो पटक मिति सार्दै २०८२ साल जेठ ३ देखि १० गतेसम्म कर्णालीमा दशौँ राष्ट्रिय खेलकुद हुने तय थियो । तर यो आर्थिक वर्षमा अब दशौँ नहुने पक्का भएको छ ।
शुक्रबार युवा तथा खेलकुद मन्त्रालयमा जारी राष्ट्रिय खेलकुद परिषदको बोर्ड बैठकमा युवा तथा खेलकुद मन्त्री तेजुलाल चौधरीले राष्ट्रिय खेलकुद जेठमा नहुने निर्णय सुनाएका हुन् । यो आर्थिक वर्षमा दशौँ नहुने जानकारी गराएको बोर्डका एक सदस्यले जानकारी दिए ।
२०७९ सालमा गण्डकी प्रदेशमा भएको नवौँ राष्ट्रिय खेलकुदको समापन अवसर दुई वर्षपछि २०२८१ मंसिरमा दशौँ कर्णाली प्रदेशमा गर्ने गरी झण्डा हस्तानतरण गरिएको थियो ।
तर भौतिक पूर्वाधार र विभिन्न कारण देखाउँदै निर्धारित समयमा दशा हुन सकेन र पहिलो पटक मिति सारेर २०८१ चैतमा गर्ने निर्णय गरिएको थियो ।
आर्थिक कारण देखाउँदै चैतमा पनि गर्न नसकिने भन्दै दोस्रो पटक मिति सारेर २०८२ जेठमा पुर्याइएको थियो । अब जेठमा पनि नहुने भएपछि दशौँ राष्ट्रिय खेलकुद यो आर्थिक वर्षमा टरेको छ ।
राखेपको उपाध्यक्षको कारण दशौं राष्ट्रिय खेलकुद नहुने अवस्था सिर्जना भएको राखेपका एक बोर्ड सदस्यले बताए । हाल सरकारको नेतृत्व गरिरहेका नेकपा एमालेको कोटाबाट राखेपको उपाध्यक्षमा नियुक्त भएका ध्रुव आचार्यसहित ५ बोर्ड सदस्यले बिहीबार प्रधानमन्त्री केपी शर्मा ओलीलाई भेटेका थिए । त्यही भेटपछि दशौं राष्ट्रिय खेल तोकिएको समयमा नहुने अवस्था आएको ती सदस्यले बताए ।
बैठकमा राष्ट्रिय खेलकुद र विभिन्न खेल संघका तदर्थ समिति गठन लगायत एजेन्डामा छलफल भइरहेको छ । बैठक चलिरहेको र सबेले आ-आफ्नो धारणा राखिरहेकोले बैठकको अन्तिम निर्णय भने पछि सार्वजनिक हुने एक सदस्यले बताए ।
