। फिल्मका एक्सन कोरियोग्राफरलाई लक्षित गर्दै अस्कर अवार्डले नयाँ विधा ‘स्टन्ट डिजाइन’ थप्ने घोषणा गरेको छ । सन् २०२७ को १०० औं संस्करणको अवार्डबाट यो विधामा पनि पुरस्कार बाँडिने जनाइएको छ ।
‘एकेडेमी अफ मोसन पिक्चर्स आर्ट्स एन्ड साइन्सेज’ले विज्ञप्ति जारी गर्दै नयाँ विधा थप्ने घोषणा गरेको छ । अस्करमा नयाँ विधालाई औपचारिकरुपमा थप्ने यो पहलको नेतृत्व ‘द फल गाई’, ‘बुलेट ट्रेन’, ‘डेडपुल २’जस्ता प्रसिद्ध हलिउड फिल्मका निर्देशक डेभिड लिचले गरेका थिए ।
फिल्म निर्देशनअघि लिचले स्टन्ट पर्फमरको रुपमा कार्य गरेका थिए । अस्करको निर्देशक समितिले नयाँ विधा थप्ने औपचारिक निर्णय गरेको छ ।
‘सिनेमाको सुरुवाती दिनदेखि नै स्टन्ट डिजाइन फिल्म निर्माणको अभिन्न अंग भएको छ’ एकेडेमीका सीईओ बिल क्रेमर र एकेडेमीका अध्यक्ष जेनेट याङले भने, ‘हामी यी प्राविधिक र रचनात्मक कलाकारहरूको नवीन कार्यलाई सम्मान गर्न पाउँदा गर्व गर्छौं, र यो महत्वपूर्ण अवसरमा पुग्न उनीहरूको प्रतिबद्धता र समर्पणको लागि हामी उनीहरूलाई बधाई दिन्छौं ।’
एक विज्ञप्तिमा, लेइचले भने, ‘स्टन्टहरू फिल्मको हरेक विधाको लागि आवश्यक छन् । हाम्रो उद्योगको इतिहासमा गहिरो जरा गाडेका छन् । बस्टर किटन, हेरोल्ड लोयड र चार्ली च्याप्लिन जस्ता प्रारम्भिक नेतृत्वकर्ताको अभूतपूर्व कामदेखि लिएर आजका स्टन्ट डिजाइनरहरू, संयोजकहरू, कलाकारहरू र कोरियोग्राफरहरूको प्रेरणादायी कलात्मकतासम्म ।’
यो नयाँ श्रेणीको घोषणा गर्दै अस्करले आफ्नो इन्स्टाग्राममा तीन फिल्मका स्टन्ट दृश्यहरूको तस्वीर सेयर गरेको छ जसमा एसएस राजामौलीको ‘आरआरआर’ को स्टन्ट दृश्यको तस्वीर पनि समावेश छ ।
‘आरआरआर’को दृश्यमा अभिनेता राम चरण बाघसँग लड्दै हाम फालिरहेका छन् । सअघि यो फिल्मको गीत ’नातु नातु’ गीतले २०२३ को अस्करमा सर्वश्रेष्ठ मौलिक गीतको पुरस्कार पाएको थियो । अन्य दुई दृश्य पनि समावेश गरिएको छ । जसमा मिशेल योह अभिनित सन् २०२२ को ‘एभ्रिथिङ एभ्रिह्वेर अल एट वान’को एक दृश्य छ ।
तेस्रो तस्वीर टम क्रूजको सन् २०११ को फिल्म ’मिसन इम्पोसिबल- घोस्ट प्रोटोकल’ बाट लिइएको हो, जसमा टम क्रुजको इथान हन्ट दुबईको बुर्ज खलिफा चढेको देखाइएको छ ।
