— इजरायली प्रधानमन्त्री बेन्यामिन नेतन्याहु, अमेरिकी राष्ट्रपति डोनाल्ड ट्रम्पलाई भेट्न वासिङ्टन जाने भएका छन् । नेतान्याहुको कार्यालयले उक्त भेटमा भन्सार शुल्क, गाजाको अवस्था र इरानी खतरा लगायतका विषयमा छलफल हुने बताएको छ ।
हृवाइट हाउसका एक अधिकारीका अनुसार बैठक सोमबार हुने भएको छ । अहिले अमेरिका र इजरायलबीच केही जटिल मुद्दा भएकाले भेट तीनै विषयमा केन्द्रित हुने जनाइएको छ । नेतान्याहु र ट्रम्पबीच हुने बैठकमा इजरायली सामानमा लगाइएको भन्सार शुल्क, गाजाबाट इजरायली बन्धक फर्काउने प्रयास, इजरायल–टर्की सम्बन्ध, इरानको खतरा र अन्तर्राष्ट्रिय फौजदारी अदालत(आईसीसी)सँगको लडाइँबारे छलफल हुने सञ्चारमाध्यमहरूले जनाएका छन् । भन्सार शुल्कबारे ट्रम्पसँग प्रत्यक्ष छलफल गर्न वासिङ्टन पुग्ने नेतान्याहु पहिलो विदेशी नेता हुनेछन् । आईसीसीले नेतान्याहुविरुद्ध गाजामा युद्ध गरेको आरोपमा गत नोभेम्बरमा पक्राउ पुर्जी जारी गरिसकेको छ ।
ट्रम्पले विश्वका अधिकांश देशहरूका लागि भन्सार शुल्क बढाएपछि इजरायलले पनि अमेरिकाबाट आउने सामानमा बाँकी रहेका १ प्रतिशत भन्सार हटाउने निर्णय गरेको थियो । तर पनि ट्रम्पले १७ प्रतिशत शुल्क लगाइदिएको कारण अमेरिका–इजरायल व्यापारमा घाटा भएको छ ।
ट्रम्पले विश्वका अधिकांश देशहरूमा भन्सार शुल्क बढाउने घोषणा गर्नुभन्दा एक दिनअघि, इजरायलले बाँकी रहेका अमेरिकी सामानमा लगाइएका सबै बााकी करहरू हटाउने प्रयास गरेको थियो । तर ट्रम्पले ट्यारिफहरू लागू गरे ।
अमेरिका इजरायलको सबैभन्दा ठूलो सहयोगी र प्रमुख व्यापार साझेदार हो । दुवै देशबीच ४० वर्षअगाडि स्वतन्त्र व्यापार सम्झौता भएको थियो, जसअनुसार अमेरिकाबाट आउने ९८ प्रतिशत सामानमा अहिले कुनै कर लाग्दैन ।
इजरायली फाइनान्स मन्त्रालयका अनुसार ट्रम्पको यो नयाँ निर्णयले इजरायली मेसिनरी र मेडिकल उपकरणको निर्यातमा असर गर्न सक्छ । पहिल्यै लागू भइसकेको ट्रम्पको १० प्रतिशत ‘बेसलाइन’ भन्सार शुल्कले अमेरिकाको बन्दरगाह, विमानस्थल र भन्सार गोदाममा प्रभाव देखिइसकेको छ ।
बुधबारदेखि ११ प्रतिशत देखि ५० प्रतिशतसम्मको प्रतिस्पर्धात्मक भन्सार शुल्क लागू हुँदैछ । युरोपेली संघबाट आउने सामानमा २० प्रतिशत र चीनबाट आउनेमा ३४ प्रतिशत कर लाग्नेछ, जसले चीनमाथिको कुल भन्सार शुल्क ५४ प्रतिशत पुर्याउनेछ ।
यस परिवर्तनले विश्व बजार हल्लिएको छ र अमेरिकाको ‘एस एन्ड पी ५००’ कम्पनीहरूको मूल्य दुई दिनमै ५ ट्रिलियन डलरसम्म घटेको छ । यो हालसम्मकै सबैभन्दा ठूलो गिरावट हो ।
