: हङकङ टी–२० चारदेशीय अन्तर्राष्ट्रिय सिरिज खेल्ने खेलाडीको बिदाइ गरिएको छ। नेपाल क्रिकेट संघ (क्यान)ले हङकङ जाने नेपाली टोलीको बिदाइ गरेको हो।
क्यानका उपाध्यक्ष रोशन सिंह, प्रवक्ता छुम्बी लामा लगायतको टिमले खेलाडीलाई बिदाइ गरेका हुन्। टिममा साहब आलम, नन्दन यादव र बसिर अहमदले राष्ट्रिय टिममा स्थान बनाएका छन्। त्यस्तै रिजन ढकाल पनि टिममा फर्किएका छन्।
नेपालले नियुक्त गरेको प्रमुख प्रशिक्षक स्टुर्अट ल नेपाल आई नपुग्दा ज्ञानेन्द्रले यो टुरमा नेपाली सिनियर टिमको प्रशिक्षण सम्हाल्नेछन्। यस सिरिजमा ज्ञानेन्द्रले पहिलो पटक सिनियर टिमलाई प्रशिक्षण गर्नेछन्।
यसअघि नेपाल ए टिमको प्रशिक्षण सम्हालेका ज्ञानेन्द्रको लागि प्रशिक्षकको रूपमा सिनियर टिमको डेब्यु हुनेछ। अप्रिल ९ देखि १३ सम्म हुने यस प्रतियोगिताको पहिलो खेलमा नेपालले कतारसँग खेल्नेछ। अप्रिल १० मा कुवेत र अप्रिल १३ मा हङकङसँग खेल्नेछ। लिग चरणको शीर्ष २ टोलीले फाइनल खेल्नेछन्। तेस्रो र चौथो टोलीले तेस्रो स्थानका लागि खेल्नेछन्।
हङकङ टी-२० सिरिजका लागि नेपालको टिम:
रोहित पौडेल (कप्तान) आशिष शेख (विकेटकिपर), कुशल भुर्तेल, लोकेश बम, बसिर अहमद, दिपेन्द्र सिंह ऐरी, कुशल मल्ल, ललित राजवंशी, सोमपाल कामी, करण केसी, साहब आलम,नन्दन यादव, रिजन ढकाल र गुल्सन झा।
