गौशाला (महोत्तरी) : गौशालास्थित ए एण्ड बी हस्पिटलमा बालकको उपचारका क्रममा मृत्यु भएपछि स्थानीयहरु आन्दोलित भएका छन्।
जिल्लाको औरही नगरपालिका-२ फुलवरियाका ६ वर्षीय बालक मोहम्मद रजा शेखको सो हस्पिटलमा उपचारका क्रममा मृत्यु भएपछि आक्रोशित समूहले तोडफोड गर्दै हस्पिटल घेराउ गरेका थिए। आइतबार साँझदेखि हस्पिटलमा स्थानीयवासीले आन्दोलन गरेका हुन्।
गौशाला नगरपालिका-५ स्थित आफन्तको घरमा इद मनाउनका लागि आएको बालक आइतबार बिहान खेल्ने क्रममा लडेर घाइते भएको थिए। घाइते बालकलाई तत्काल उपचारका लागि सोही हस्पिटलमा भर्ना गरेको थियो।
अन्तिम समयसम्म पनि बालकलाई उपचारको बहानामा चिकित्सकले बालकलाई रेफर नगरकै कारण अस्पतालमा बालकको अकालमै ज्यान गुमाएको परिवारले आरोप लगाएका छन्।
सयौंको संख्यामा आन्दोलित स्थानीयहरु सञ्चालक डा.बिमल महतोमाथि कुटपिटको समेत प्रयास गरेको थियो। त्यसपछि डा. महतो फरार छन्।
आन्दोलन क्षेत्रमा समयमै प्रहरी परिचालन गरेपछि तत्कालै भिड साम्य भएको इलाका प्रहरी कार्यालय गौशालाले जनाएको छ। घटनाको सम्बन्धमा थप अनुसन्धान भइरहेको र शवको पोस्टमार्टमका लागि प्रक्रिया सुरु गरिएको प्रहरी निरीक्षक उतमसिंह भण्डारीले बताए।
