: प्रिमियर लिगमा भएको खेलमा फुलहमले लिभरपुललाई ३-२ले हराएको छ। प्रिमियर लिगको शीर्ष स्थानमा रहेको लिभरपुल अपराजित रहँदै खेलिरहेको थियो।
खेलको १४औं मिनेटमा एलेक्सिक म्याक एलिटरले गोल गर्दै लिभरपुललाई अग्रता दिलाएका थिए। अग्रता बनाए पनि लिभरपुलले त्यसलाई जोगाउन सकेन। खेलको तेइसौं मिनेटमा फुलहमका लागि रायन सेसेगोनले बराबरी गोल फर्काएका थिए।
पहिलो हाफमा नै फुलहमले थप दुई गोल गर्यो। खेलको ३२ औँ मिनेटमा एलेक्स युभीले गोल गरे। त्यस्तै रोड्रिगो मुनिजले ३७ औँ मिनेटमा गोल गरेका थिए। पहिलो हाफ ३-१ ले अग्रता बनाएको फुलहमले दोस्रो हाफमा गोल गर्न सकेन।
यता लिभरपुलको लागि भने ७२ औँ मिनेटमा लुइस डियाज दोस्रो गोल गरे। हार बेहोरे पनि लिभरपुलले ३१ खेलबाट ७३ अङ्क बटुल्दै अंक तालिकाको शीर्ष स्थानमा रहेको छ। दोस्रो स्थानमा आर्सनल रहेको छ। आर्सनलभन्दा लिभरपुल ११ अङ्कले अगाडि रहेको छ।
अब लिभरपुललाई २० औँ पटक प्रिमियर लिग जित्न ११ अङ्क भए पुग्छ। लिभरपुललाई हराएको फुलहमको पनि युरोपियन प्रतियोगिता छनोट हुने सम्भावना कायमै छ। फुलहमले ३१ खेलबाट ४८ अङ्क जोडेर आठौं स्थानमा उक्लिएको छ। प्रिमियर लिगको आइतबार नै भएको अर्को खेलमा टोटनहमले साउथ हम्प्टनलाई ३-१ ले पराजित गरेको थियो।
