— म्यानमारमा गत मार्च २८ मा गएको विनाशकारी भूकम्पमा ३ हजार ३ सय ५४ जना मृत्यु भएको म्यानमारको सैन्य सरकार जुन्टाले जनाएको छ । देशभरका भवन र पूर्वाधारसमेत ध्वस्त पारेको उक्त भूकम्पमा परी ४ हजार ५ सय ८ जना घाइते तथा २ सय २० जना बेपत्ता भएको जनाइएको छ । साथै, संयुक्त राष्ट्रसंघका सहायता प्रमुखले विश्वसामु विपद्ग्रस्त राष्ट्रलाई सहयोग गर्न आह्वान गरेका छन् ।
विपद् भएको एक साताभन्दा बढी समयपछि पनि देशका धेरै जना अझै आश्रयविहीन बनेका छन्, भने घरहरू क्षतिग्रस्त भएका कारण वा थप भत्किने डरले अझै बाहिरै सुत्न बाध्य छन् । यस भूकम्पले ३० लाखभन्दा बढी मानिस प्रभावित भएको हुन सक्ने संयुक्त राष्ट्रसंघले अनुमान गरेको छ । चार वर्षदेखि गृहयुद्धको चपेटामा परिरहेको म्यानमारलाई भूकम्पले थप संकटमा पारेको छ ।
संयुक्त राष्ट्रसंघका शीर्ष सहायता अधिकारीले शनिबार मध्य–म्यानमारको मण्डाले सहरमा भूकम्प पीडितसँग साक्षात्कार गरेका थिए । भूकम्पको केन्द्रबिन्दु रहेको मन्डाले क्षेत्रमा बढी क्षति पुगेको छ । त्यसपछि उनले सामाजिक सन्जाल एक्समा लेखेका छन्, ‘विनाशको अवस्था डरलाग्दो छ, अहिलेको अवस्थामा विश्व नै म्यानमारका जनताको साथमा उभिनुपर्छ ।’
भूकम्पपछि म्यानमारको सैन्य सरकारले मन्डाले विमानस्थलमा अस्थायी अस्पताल र राहत शिविर सञ्चालनमा ल्याएको थियो । भूकम्पकै कारण धावनमार्गमा क्षति पुगेपछि विमानस्थल बन्द भएको थियो । म्यानमारमा २०२१ मा सेनाले ‘कु’ गरी सत्ता हत्याएको थियो । सैन्य सरकारले देशभित्रका सूचना सार्वजनिक गर्न कडाइ गर्दै आएको छ भने भूकम्पको क्षतिका बारेमा सरकारी सञ्चारमाध्यममा नै भर पर्नुपर्ने अवस्था छ ।
म्यानमारको सैन्य सरकारले भूकम्प गएलगत्तै देशका ६ स्थानमा आपत्कालीन अवस्था घोषणा गर्दै अन्तर्राष्ट्रिय सहयोगका लागि अपिल गरेको थियो ।
